Feb. 22 atangin pawl 9 leh 11 kal thei dawn

Karleh Thawhtanni, February 22, 2021 atang khian Mizoram-a pawl 9 leh 11 zirlaite chu School leh Hostel-ah an lut leh tan thei dawn ta.

Mizoram State Disaster Management Authority-a State Executive Committee Chairman leh Chief Secretary, Lalnunmawia Chuaungo chuan niminpiah khan thuchhuah siamin kumin January 16-a hri leng avanga mipui kaihhruaina lo siam tawh thenkhat chu tih danglam a nih thu a tarlang a. Hemi ang hian February 22, 2021 atangin Class IX leh Class XI zirlai ten School leh Hostel an lut tan thei anga. School lut tur reng reng te chu Thermal Screening hmanga lo endik vek tur an nih bakah Hostel-a lut tur reng reng chuan RT-PCR/TrueNAT Test/Rapid Antigen Test Negative Certificate chu Hostel an luh hma darkar 96 aia rei lova lak an nei ngei tur a nih bakah School Education Department-in ruahmanna leh inkaihhruaina (SOP) a siamte uluk taka zawm tur a ni ang.

Hei bakah hian Mizoram chhunga College leh University te pawh an Hostel-te tiamin February, 2021 atangin hawn phalsak an ni a. Amaherawhchu, Higher & Technical Education Department-in College leh University te inpuahchahna leh ruahmanna te a hmuna an endik hnuah an inpeih thu hriatpuina a pe tur a ni. Training/Skill Training/Coaching/Vocational Institutions te pawh hawn phal a ni tawh bawk a, amaherawhchu, Room pakhatah room-a leng zat chanve (50% of seating capacity) aia tam tum khatah awm/lut phal a ni lo bawk a ni.