END in Mizo mipuite tanpuina an ngen

Excise & Narcotics Department chuan Mizoram chu ruihhlo leh Zu laka a him theihna tur leh a dapchhuahna kawnga dan kengkawhtute tha tichak turin Mizo mipuite tanpuina an ngen.

Hemi chungchanga nimin a thuchhuah an siamah Excise & Narcotics Department chuan May 28, 2019 atang khan Zu khap burna dan – The Mizoram Liquor (Prohibition) Act, 2019 (MLP Act) chu Mizoram pumah (Autonomous District Council pathum tiam lovin) hman a nih thu leh he Dan hnuaiah hian Zu siam, in, lakluh, zawrh hralh, phurhkual, etc khap a ni tih an tarlang a. Tunlai in Mizoram hmun hrang hrangah khawchhak lam atanga zu lam chi in theih (Alcoholic Drink) chi hrang hrang (Korean Soju, Wine cooler, etc) lakluh a awmin, Dawr, Restaurant, Hotel bakah online-a zuar an awm tih hriat a ni tih an tarlang a ni.

Hetiang alcoholic drink hi The MLP Act 2019 Section 2 clause ‘r’ in ‘Zu/Liqour’ tia a tarlan a ni tih tarkangin, Dan anga man theih an ni tih an thuchhuah chuan an tarlang a. Chutiang bawkin hetiang in, lalut, zuar, hralh, phurkualte chu MLP Act 2019 Section 6 & 7 tlawhchhana hrem theih an ni tih an sawi bawk a ni.