District Hqrs. tinah Two Wheeler Taxi tlan phal

Transport Minister, TJ. Lalnuntluanga chuan District Headquarters tinah Two Wheeler Taxi tlan phalna pek a ni tawh tih a sawi a, Ai-zawl-ah pawh Permit hi a tul anga pek chhoh zel tum a ni tih House a hrilh.

Nimin a Assembly inkhawm ah zawhna leh chhanna hunah ZPM Member, VL. Zaithanzama zawhna chhanga he thu hi sawiin Transport Minister chuan Two Wheeler Taxi Permit pek chhuah chungchang ah thalai eizawnna tur neilo tam tak an awm a, eizawnna atana Two Wheeler Permit neih duh an tam tih Sawrkar-in a hria tih a sawi a. A bikin Aizawl tlaklam leh chhuah lam-ah Taxi leh City Bus duh angin a la tam lova, hemi avanga mipui harsatna sukiang turin Two Wheeler Taxi Permit chu a tul anga ngaihtuah chhun-zawm zel tum a ni a, engzat nge pekchhuah tur tih erawh bithliah chi a ni lova, mipui mamawh dan thlir chunga hmalak tum a ni, a ti a. Two Wheeler Permit hi District Headquarters hrang hrangah State Transport Authority kaltlangin tlan phalna pek a ni tawh tih a sawi bawk.
    TJ. Lalnuntluanga chuan, thenawm State Manipur leh Tripura-a MST Bus tlantir tuma hmalakna pawh bawhzui mek a ni tih a sawi a. Manipur Churachandpur-a Bus tlan tir tur hian Manipur Sawrkar-ah dilna thlen a ni tawh a, Reciprocal Agreement thehlut tura an tih angin Draft Reciprocal Agreement thehlut a ni tawh a, tunah hian Manipur Sawrkar pawm-puina nghah mek a ni tih a sawi.
    Tripura-a Bus tlantir chungchangah pawh Transport Minister chuan, Tripura Sawrkar-ah dilna thlen tawh niin, an Sawrkar pawmpuina nghah mek a ni tih a sawi a. Myanmar-a Bus tlantir chungchangah erawh ram leh ram inkar thil a nih avangin External Affairs Ministry hmalakna ngaihchan mek a ni a, Ministry-ah hian dilna lehkha thehluh a ni tawh tih Transport Minister chuan a sawi bawk.