Assembly House-a Larsap thusawi-a lawmthu sawina Motion lungrual taka pass a ni
Nimin-a Assembly thutkhawm a Motion sawihona ah hian Congress Legislature Party Leader, Zodintluanga chuan, Larsap thusawi chu Congress Party tan chuan lawmna tur hlir a ni tih a sawi a. A chhan chu Larsap thusawia sawrkar hmalakna a tarlan tam ber chu Congress Sawrkar liamta hnathawh a nih vang a ni, a ti. Zodintluanga chuan, Larsap thusawi-a lang tura an ngaih zingah Brandisii leh Latiflorus lam alang lo chu pawi a tih thu a sawi a, Raw chin chungchang hi Chief Minister-in tui takin a lo sawi tawh thin a, hetiang a ni chunga Larsap thusawiah a lang tel lo hian phai atanga Raw chi lo lut chu mipuiin CM sumdawnna emaw an tih palh a hlauhthawn thu leh sawrkar hmalakna ropui ber ni tur si hmaih a ni chu a zia lo hle a ni, a ti. CLP Leader chuan, tunhnaia thawm ring tak Assam Rifles sawn chungchang leh SEDP sem a nih tur thu Larsap thusawia a lang chu pawi a tih thu a sawi bawk.
ZPM Group Leader, Vanlalhlana pawhin, an Member an kim ta lo chu khawhar thlak a tih thu a sawi a. Speaker thutlukna ah an vui tihna ni lovin, kum 1986 inthlana Independent MLA-ten MNF Sawrkar an siam khan tumahin an hek lova, Record-ah erawh Independent MLA tih veka chhinchhiah an tih a sawi a. Kum 1993-ah pawh Independent MLA te Sawrkar-a an tel khan tumahin an hek lo tih sawiin, a hma kha chuan hektu an awm lova, tunah erawh hektu an awm tih chauh chu Lalduhoma chungchanga thil danglam awmchhun a ni tih a sawi. Vanlalhlana chuan, Mizo mipui hriatthiam danin, MNF Party hian an Sawrkar chuan Budget hmasa berah SEDP atan sum dah nghal a ni ang a, NLUP dawng tawhte pawhin cheng nuai 3 aia tlem lo an dawng leh vek dawn tih an sawi vangin mipuiin an sawrkar tir a, hetiang hi ni mah se Vawiin thlengin SEDP sem a la ni ta lo a, an tlinpui hi an tlakpui leh mai ang tih a hlauhawm hle a ni, a ti bawk.
He sawihona tlangkawmtu House Leader, Zoramthanga chuan, COVID-19 hri leng doletna kawnga mipui, Kohhran, tlawmngai pawl leh Police-te thawhhona chu fakawm a tih thu a sawi a. Hri lang vangin sum leh pai-ah harsatna nasa tak a thleng tih sawiin, Central atanga sum lo kal nasa takin a tlahniam a, chuti chung chuan a theih ang angin an kal hram hram tih a sawi.
Chief Minister Zoramthanga chuan, ramri buai chungchangah Assam atanga pemchhuak ten harsatna an tawk vek tih a sawi a, Assam ramri buai hi Bangladesh atanga dan lova lo pem ten inthlan dawna an chawhchhuah a ni tlangpui tih sawiin, tunhnaiah buaina neuh neuh thleng bawk mah se, hloh lam aiin hma an sawn zel a, ramri humhalh tura Police leh mipuite chet dan chu a fakawm hle a ni, a ti.
Chief Minister chuan, Zu zawrh titawp-a khap a ni ta chu an Sawrkar thil tih fuh ber zinga mi a ni tih a sawi a, Sawrkar phalnaa Zu zawrh a nih lai khan thalai an thi zawih zawih a, an Sawrkar hnuah harsa tak chungin an khap thei ta a, Zu khap tur hian harsatna tam tak an tawk tih sawiin, Court lama khingtu pawh an awm hial tih a sawi bawk.
Larsap thusawi avanga lamthu sawina Motion sawihonaah hian member 26-in thu an sawi a, sawihona zawh a nih hnuah Speaker, Lalrinliana Sailo-in Motion chu pawm an remtih leh tih loh Member-te a rawn a, member remtih angin Motion hi lungrual takin an pawm a ni.
Comments
Post a Comment