COVID-19 hri kai thar leh enkawl dam 3 ve ve awm

Niminpiah khan Mizoram-ah Sample 704 enfiah leh niin heng atang hian COVID-19 hri kai mi pathum hmuh leh an ni.

Niminpiah-a hri kai hmuhchhuah te hi Rapid Antigen Test hmanga Sample enfiah 585 te atanga hmuh vek an ni a, Aizawl District-ah New Serzawl mi pakhat chu a chetsual avanga damdawi In panpui a nih hnuah a taksa-ah natna hri kai lanchhuahna a neih avanga a Sample enfiah a nih hnuah hri a kai tih hmuhchhuah a ni a, Lunglei District-ah New Siaha mi VFA Training tur chu hri a kai tih hmuhchhuah ni bawkin Lawngtlai-ah Hostel-a lut tur naupang pakhat enfiah chu hri a kai tih hmuhchhuah a ni bawk.

Niminpiah khan ZMC Laboratory-ah Sample 68 enfiah niin hri kai hmuhchhuah an awm lova, District hrang hranga TrueNat Laboratory-ah Sample 51 enfiah ni bawkin hri kai hmuh an awmlo bawk a ni. Hetihlai hian nimin khan Mizoram-a hri kai enkawl mi 3 te chu hri laka an fihlim hnuah anmahni enkawlna hmun atanga chhuahtir leh an ni a, heti hian nimin tlai dar 5:00 thleng khan Mizoram-ah hri kai 4376 hmuhchhuah ni tawhin anzinga 4337 te chu enkawl dam an ni tawh a, hri kai hmuhchhuah atanga za zela 99.10 te chu enkawl dam ni tawhin tunah hian hri kai enkawllai 30an la awm mek a, hri kai zingah nunna chan mi 9 an awm tawh bawk a ni.