Chief Minister-ah thlen
JAC on Inner Line Reserve Forest hruaitute chuan nimin khan Chief Minister, Zoramthanga chu a Office-ah kawmin Assam leh Mizoram ramri chungchanga Area Devolopement Board siam tura rawtna ziakin an thlen a, Chief Minister chuan Board siam dan tur leh a kalphung tur chu an lo ngaihven tur thu a sawi a. Ramri hrul Devolopement chu an ngaih pawimawh thu leh an kalpui mek thu sawiin, hmalakna kallai te a lo hrilh bawk a ni. JAC hruaitute chuan kan hmalam hun kal zel turah leh ramri leh thildang a thawhho zel an duh thu Chief Minister hnenah hian thlenin, Chief Minister chuan rem a tih thu leh thawhhona tha neih zel tha a tih thu alo hrilh a. Assam Police ten tunhnaia ramri hrula thlai an tihchhiat leh MGNREGS hnuaia hnathawh chhinchhiahna an tihchhiat chungchanga Kanhmun Police Station-a SDO (Civil) in FIR a thehluh pawh he hunah hian sawichhuah niin Chief Minister chuan lo enzui a hmalak a tum thu a sawi bawk a ni.
Lung In tang turin rel sak
Kum 2006-a DM&R Department atanga Silpaulin Bill lem hmanga chêng nuai 35.85 lâk chungchânga Special Court (Prevention of Corruption Act) in thiamloh a chantir mi 4 te hremna chu nimin khan puanchhuah niin an zinga sawrkar hnathawk mi pathum- khatih lâia DM&R Director PC. Lalthlamuana (75), Cashier Lal-hmingliani (58) leh LDC R. Vanlalhmuaka (55) te chu kum 2 theuh lung In tang turin an chungthu a rel sak a, Silpauline Supplier, Thanzami To-chhawng (76) pawh kum khat tang turin rel sak a ni bawk. Heng mite Ukil hian Court-ah Bail dilna siam nghalin Court chuan a remtih sak nghal bawk a ni.
Tuitla ruang hmu ve ve ta
Zirtawpni kalta-a Tuirial lui-a chesual-a tui a tla, Thanglalduata (17), Sunhluchhip ruang chu nimin zing dar 10:00 vel khan an chetsualna bul lawkah hmuh niin heti hian he vanduaina thlenga tui tla mi 2 te ruang chu hmuh ve ve a ni ta a ni.
Hri danna pek dan thlirlet
Lawngtlai District Task Force Immunisation (DTFI) chu nimin khan an Chairman, Lawngtlai Bawrhsap Dr. Andrew H. Vanlaldika hova thu-khawmin tunhnaia hmalakna hrang hrang an thlirlet a. He hunah hian an District-a Healthcare Worker mi 700 te hnenah COVID-19 hri danna pek a nih tawh thu leh Feb. 17 atangin Dose hnihna an pek leh tur thu tarlan a ni. Hei bakah hian Special Immunisation Activity pawh tluang taka kalpui mek a nih thu leh Feb. 2, 2021 atanga National Immunisation Day kalpuiah Lawngtlai District chhunga nausen piang hlim atanga naupang kum 5 chin hnenah Zenghri danna pek a nih thu tarlan niin hri danna la thei naupang 16,106 atangin naupang 15,924-in hri danna an lak thu tarlan a ni bawk.
BOP sak hna chhunzawm leh
Indo-Bangla Border hrul hmun hrang hranga sipaite awmna hmun tur, Border Outpost sak hna chu a tira thawktute ban an nih hnuin chhun-zawm leh tan a ni a, Engineering Projects India Limited enkawlna hnuaia BOP pakua (9) sak hna hi a tirah Jay Brothers Construction Company ten thawkin, an hna an thawh that tawk loh bakah an thawh muan avangin ban an ni a, hemi hnu hian Court-ah hemi chungchang hi ngaihtuah a nih avangin rei tak chhung chu hna chawlhsan a ngaih phah a ni. BOP sak hna tan tawh, la puitlin si loh thawk chhunzawm tur hian Construction Company pathum dang lak niin, ngawrh takin hna thawh chhunzawm leh tan a ni a, nakum March thla ralhmaa sak zawh hman tur a ni.
State Day lawm a ni dawn
Tun thla ni 20-a ‘Mizoram State Day’ vawi 35-na lo thleng tur chu Aizawl leh District khawpui hrang hrang ah te a lawmna buatsaih a ni dawn a, hemi chungchang sawrkar thuchhuah in a tar-lan dan chuan Aizawl-ah chuan Mizoram Larsap, P.S.Sreedharan Pillai chu Khuallian a ni anga, District khawpui dangah te chuan Deputy Commissioner theuh kaihhruaina hnuaiah Mizoram State Day hi lawm a ni ang. Mizoram State Day lawmna Aizawl-ah neih turah hian Sawrkar hnathawk Junior Administrative Grade chin chunglam, Aizawl-a awmte chu State Day lawmna ah hian kal theuh tur a ni dawn a ni.
Comments
Post a Comment