Latest News

Chanchin thar thenkhat :

NAAC in MCON 'B' Grade pe

Mizoram College of Nursing (MCON) chu NAAC Accreditation 'B' Grade (2.39) pek niin India hmarchhak (North-East Region) bikah chuan Nursing College mal din zingah NAAC Accreditation Grade-B hmu hmasa ber an ni. Falkawn-a Mizoram College of Nursing (MCON) hi kumin Feb. 11 leh 12 khan National Assessment and Accreditation Council (NAAC) Peer Team chuan tlawhin an dinhmun te an enfiah a, Feb. 15 khan NAAC Accreditation 'B' Grade pek an nih thu hi puan a ni.

Mizoram College of Nursing (MCON) hi kum 1980 khan Nursing School, Civil Hospital, Aizawl-ah GNM Course zirna anga bul tan niin kum 2005 khan B.Sc Nursing zirna College-ah hlankai a ni a. Indian Nursing Council (INC) recognized niin, Mizoram University (MZU) hnuaiah kum 6 chhung temporary affiliation-a a awm hnuah Permanent affiliation pek a ni. Tun dinhmun ah Zirlai 117 awm mekin mi 349 in an zirchhuak tawh a ni.


PMEGP hmalakna tur thlirho

State Level Monitoring Committee on Prime Minister Employment Generation Programme (PMEGP) leh Bank hrang hrang aiawhte chu nimin khan Aizawl-ah thukhawmin PMEGP hnuaia hmalakna turte an sawiho a, kumhlui quarter hnuhnung ber atanga kum lo kal tur atana Mizoram tana PMEGP sum ruahman chu cheng nuai 2893.4 a nih thu tarlan a ni bawk.


Mat lui-a chesual vuiliam

Niminpiah-a Mat lui-a chesual-a boral, PC. Lalhmangaihropuii (19), Zobawk South chu nimin khan vuiliam a ni. Thudawn danin niminpiah khan Zobawk South-a Ebenezer Unit TKP-a Group pakhat chuan Mat lui-a Chengkawl khawrhin sum an tuak a, an zing ami PC. Lalhmangaihro-puii hi thim dawnah a kimlo tih hriain an zawng nghal a, an awmna bul lawk-a lungsum-ah a lo tla a, a nunna chhan theih lohin a boral zui a, a ruang hi lumen a nih hnuah nimin khan vuiliam a ni.


MNF kum 60-na lawm tum

MNF Diamond Jubillee Committee chu nimin khan an Chairman, Vanlalzawma kaihhruaiin a tum khatna atan Aizawl-ah Mizo Hnam Run-ah an thukhawm a, he hunah hian Oct. 22, 2021-a MNF dinchampha vawi 60-na lo thleng tur lawm dan tur relin he Jubilee-ah hian Thupui (Theme) atan 'Mizo Nationalism' tih hman nise an ti a. MNF Diamond Jubillee Lungphun siam an rel bakah Souvenir siam nise an ti bawk. Hei bakah hian he Jubilee lawmna tur atana a tul anga hma la tur Sub-Committee din nise tiin tun thla ni 23 khian thutkhawm hi neih leh nise an ti bawk.

Comments

Chhiar Hlawhte