Gas tih chingpen man a lawmawm

Gas tih chingpen man a lawmawm

MIZOFED Serchhip Branch ten niminpiah-a Serchhip-a eirawngbawlna Gas an sem tur chu a semtu tur te hian a buk a tlinglo nia an hriat avangin Legal Metrology Enforcement Staff te ko-in enfiah a nih hnuah buk tlinglo bur 60 zet manchhuah a ni a, hetianga Serchhip mipuite eirawngbawlna Gas lak tur tih chiangpen a ni hi a pawiin MIZOFED-a kan hnathawk ten thil diklo hmuhchhuah a nih theihna tura hma an la leh Legal Metrology lam pawhin chak taka bawhzuia hma an la zui hi a lawmawm hle a ni.

Serchhip-a eirawngbawlna Gas rawn thleng te hi Kudam-ah hlanthlak a ni ngai lova, Legal Metrology Enforcement Staff ten Truck-a a awmlai a theih anga an enfiah hnu ah mipuite hnenah semchhuah nghal zel a ni thin a. Truck-a an rawn phurh zawng zawng hi enfiah vek theih a nih loh avangin lo khawih chingpen duh an awm a nih chuan bur eng-emaw zat chu thuhruk pawh harsa lutuk lo a nih theihna lai a awm a, hei vang hian mipuite hian Gas kan lak dawnah pawh buk ngeia lak nachang kan hriat hi a tul hle a ni.

Eirawngbawlna Gas Kg. 14.2 a rit, kan hman lar ber hi tunhnaiah bur khat Rs. 850/- vel te a ni thin a, hetianga chhut hian Gas kan lak Kg. 1 hi Rs. 50-60 man vel te a ni thin a. Hetianga kan eirawngbawlna Gas lak tur a buk a lo tlinloh hian a lo thlawnin sum tam tak mipuite hian kan sengral thin a ni tih hi kan hriat a pawimawh hle mai. Hemi kawngah hian YMA Sub-Hqrs. Serchhip pawhin nasa taka hma la mekin mipuite pawhin sum kan pek in a lei theih zat ngei Gas kan hmuh theih nan hian tan kan lak a tul a. Eirawngbawlna Gas kan lak in a buk tling ngei lak hi kan chanvo tih mipuite hian i hre reng ang u.