Burma Sipaite chetna tuartu Zohnahthlakte thlavang hauh nan Sit-in demonstration neih a ni

MZP General Hqrs. buatsaihin nimin khan Aizawl-a Vanapa Hall kawt-ah tunhnaia Burma Sipaite chetna tuartu Zohnahthlakte thlavang hauh nan Sit-in demonstration neih a ni a, he hunah hian MZP hruaitute leh tlawmngai pawl hruaitute bakah Political Party aiawh ten thu an sawi a ni.

MZP General Hqrs. hian niminpiah khan thutkhawm neiin Burma Sipai ten mipui rorelna zah miah lova sawrkarna chelh mektu NLD hotute an man ta mai leh man zingah Zohnahthlak unau engemawzat an tel ve chungchang sawihoin, pawi an ti takzet tih an sawi a, Burma sipaite chet dan chu Democracy palzutna leh zahlohnaah ah ngaiin Burma Sipai ten mipui thlanchhuah roreltu an hrente leh thuneihna an laksak hi a rang thei ang bera pe let leh turin a ngen tih an sawi a. Burma Sipai te chet dan leh thuneihna duh vanga, mihring dikna chanvo rapbet a, an chetna duh loh lantir nan nimin chhun khan Aizawl Vanapa Hall kawt-ah an Finance Secretary, Chinkhanmanga Thomte kaihhruaia Sit-in demonstration hi an nei ta a ni.

He huna thu sawitu MZP General Hqrs. Vice President, Peter Chhangte chuan an kalkhawm chhan chu Political Party thil a nilo tih sawiin, in unauna thinlung pu-a he hun hi hmang an nih thu an sawi a. “Kan unaute harsatna hi kan harsatna a ni a, an hlimna chu kan hlimna a ni,” tiin, “He hun kan hman chhan hi Myanmar kan unaute kan lainata kan khawngaihzia lantirnan a buatsaih kan ni a. Kan sawrkar thuneitute pawhin tun aia nasa zawka kan unaute tan ngaihtuahna senga hmala ve turin kan sawm a. Kan unaute tan englai pawhin MZP chu kan awm reng dawn a ni,” a ti bawk.

He hunah hian NGO Coordination Committee-a Chairman Vanlalruata chuan, Myanmar sipaite'n NLD sawrkar thuneihna an hnehchhuh chu a dem thu sawiin, “Khi lama kan unaute tan theihtawp chhuahin kan lo che chhuak tawh thin a, tuna an boruak tawn hi kan tawrhpui takzet a ni,” a ti a; Mizoram sawrkar chu eng pawh hma-chhawn thei tura inpuahchahna nei tur leh India sawrkar pawh a tul anga nawr tha a tih thu a sawi bawk.

Nimin-a he hun hmanna ah hian Political party hrang hrang aiawhte pawhin thu sawiin Myanmar-a thil thleng chu pawi an tih thu leh an dem thu te an sawi a ni.