Latest News

Chanchin thar thenkhat :

Chapchar Kut hman dan tur rel

Mizote Kut pawimawh, Chapchar Kut chu kumin hian mipui him tlan zawk theih nan TV leh internet kaltlanga an chhim theih tura hman tum a ni. Kumin March 5-a Chapchar Kut lo thleng tur hman dan tur ngaihtuahin nimin khan Chapchar Kut Organizing Committee chu an Chairman, Chief Minister Zoramthanga hovin CM Conference Hall-ah an Thukhawm a, COVID-19 hrileng avangin kumin Chapchar Kut chu kumdang anga ropui taka hman a theih loh thu tarlan niin, mipui him tlan zawk theih nan TV leh internet kaltlanga an chhim theih tur programme buatsaih nise an ti a, hun hman dan tur chipchiar chu Programme Sub-Committee ruahman tura dah a ni bawk. Chapchar Kut hi kumdang anga hman theih ni dawnlo mahse he Kut pawimawhna hi dai mai lova Zonun zemawi chhawmnun zel a nih theih nan a remchan anga hmalak nise an ti bawk.


MP Model Village tur thlang

Mizoram Rajya Sabha MP, K. Vanlalvena chuan Saansad Adarsh Gram Yojana (SAGY) hnuaia Model Village atan Mizoram-a khaw 4 a thlang. Sawrkar laipui ruahmanna anga Saan-sad Adarsh Gram Yojana (SAGY) hnuaia MP ten an bial chhunga Model Village tur an thlan ah Mizoram Rajya Sabha MP, K. Vanlalvena chuan kum 2021-2024 chhunga Model Village atan khaw 4- N. Mualcheng, Hrangturzo A/C, Serchhip District; Ratu, Tuivawl A/C, Aizawl District; Pangkhua, Lawngtlai East A/C, Lawngtlai District leh Phura, Pallak A/C, Siaha District te chu a thlang a ni.


Candidate 66 awm dawn

Ward 19 awmna Aizawl Municipal Corporation (AMC) inthlanna tun thla ni 16-a neih tura chuh tum te tana inhnuhdawh theihna hun khar a nih hnu ah inhnukdawk an awmloh avangin he inthlanna ah hian Candidate 66 an awm dawn ta a, MNF, Congress leh ZPM ten Candidate 19 Theuh neiin BJP chuan Candidate 9 an nei dawn bawk a ni.


Session neih tur thlirlawk

Nimin khan Mizoram Legislative Assembly Speaker, Lalrinliana Sailo hovin Deputy Speaker Er. Lalrinawma, Chief Secretary Lalnunmawia Chuaungo leh sawrkar official pawimawh dang ten Mizoram Legislative Assembly 8-na Thutkhawm vawi 7-na neih tura hripui laka himna tur ruahmanna an thlirho a, he hunah hian hian hripui laka him nan Standard Operating Procedure duan dan tur te, Assembly Hall chhungah MLA te Thuthmun rem dan tur te, Session-a tel tur zawng zawng CO-VID-19 Test paltlang tir an ni dawn em tih te leh Tul dang te rel a ni. Mizoram Legislative Assembly Budget Session hi tun thla ni 23 khian neih Tan tura ruahman a ni.


MNYF in Fehchhuah Tan

MNF Thalai Mizo National Youth Front (MNYF) chuan AMC inthlan campaign-na 'Sikpui Fehchhuah' chu nimin zing khan  Aizawl Khatla kawn-ah an nei Tan a, he hunah hian MNYF President, Er. Lalrinawma chuan AMC chu MNF sawrkarin bul Tan-a hma a lakna avanga lo ding a ni tih sawiin, a paitu ngei chu a enkawl seiliantu atan pawh a Tha berin a rinawm tih a sawi. State sawrkar tan thawhpui theihloh tur tumah an awm lo tih sawiin, “Mahse thawhpui nuam an awm a ni,” tiin State leh AMC-a party thuhmunin sawrkarna a siam chuan, inthurual zawk leh chak zawkin hmasawnna pawh kalpui theih a ni dawn tih a sawi bawk.

Comments

Chhiar Hlawhte