Assembly thutkhawm neih dan tur ruahman

Tun thla ni 23 tanga Mizoram Legislative Assembly Budget Session neih tur chu March 17 thleng neih tura ruahman a ni.

Mizoram Legislative Assembly hnuaia Business Advisory Committee chu nimin khan an Chairman Assembly Speaker, Lalrinliana Sailo kaihhruaia thukhawmin Mizoram Larsap-in Mizoram Legislative Assembly 8-na thutkhawm vawi 7-na neih tur a koh-a hun hman dan tur an sawiho a, he thutkhawm hi February 23, 2021 chawhma dar 10:30 atanga neih turin Larsap chuan a ko a ni.

Business Advisory Committee hian Assembly thutkhawm hi February ni 23, 2021 atanga March ni 17, 2021, ni 23 chhunga neih turin ruahmanna an siam a, hemi chhung hian thutkhawm tum 15 neih tura ruahman a ni. Thutkhawm neih tan ni, Feb. 23, 2021-ah Mizoram Larsap-in Assembly Session-ah thu a sawi ang a, March ni 1, 2021-ah Finance Minister-in Mizoram budget 2021-2022 a pharh dawn a ni.