ZNP intite hi mi kheuhbeuh tlemte, MNF khuangben ruala lâm thin ang an ni - ZPM Thalai

ZPM Thalaite chuan, ZNP inti te chu mi kheuhbeuh tlemte, MNF khuangben ruala lâm thin ang an ni tih sawiin, ZPM an beihfo-na chu thu tak hla taka lak chi a ni lo tih an sawi.

Nimin-a thuchhuah an siamah ZPM Thalaite chuan ZPM atanga ZNP din thar lehtu inti tlem te te chu vawikhatmah MNF sawrkar bei ngam lo-a ZPM bei ngar ngartu te an ni tih sawiin, Inthlan dawnah ZPM dinhmun káng zel beng hniam tuma thapui thawhin, an tih theih tawk thuchhuah an siam ve zut tih an sawi a. ZNP intite hi mi kheuhbeuh tlemte, ZPM-a thawhhona tichhe zawnga khawsa thin te, ZPM tichaktu aia uaifualtute an ni tih sawiin, Party-a nihna sapui hauha, mi thar tha tak takte lo luhna tur daltute an ni thin tih an sawi a. Nikum-a Local Council inthlan dawn khan ZPM a phel anga lantir tumin tan an khawh ve nia sawiin, hun a kal zel a, mipuiin an nihna dik tak an hmu chiang ta hle tih an sawi a, MNF Party President, Zoramthanga leh an ZNP OB-te thlalaka an lan hona te chu thup rual lovin Social Media lamah pawh a lo darh ta tih an sawi.

ZPM Thalaite chuan ZNP intite chu 'Kalphung Thar' buaipui aia mimal nihna leh hamthatnaa buai zawk an ni tih pawh sawiin, heng mi te hi mi tlemte an ni nachungin, Phone Voice Record atanga a lan dan chuan, MNF atanga nuai 9 chuang leh Computer an dawn leh dawn lovah anmahni karah an buai hle tih a hriat theih tih an sawi a. Hetiang mi mumal lo ten thuchhuah siama ZPM an beihfo-na chu thu tak hla taka lak chi a ni lo tih sawiin, ZNP intite chu patling tak leh zahawm taka politics khel ngam turin an ngen bawk.