Assam Rifles in ralthuam phochhuahna nei

Serchhip-a awm 8th Assam Rifles te chuan tun thla ni 28-a ‘National Science Day’ lo thleng tur pualin nimin khan Serchhip-a Assam Rifles Parade Ground-ah ralthuam phochhuahna hun an hmang.

8th Assam Rifles hotute chuan National Science Day lo thleng tur pual hian Govt. Higher Secondary School naupang te chu an ralthuam neih angte hmuhsak turin an sawm tih an sawi a, hei hian zirlai naupangte ah Assam Rifles zawm duhna chona thar a pek an beisei vang niin an sawi.

8th Assam Rifles hotute chuan March ni 1 atanga April ni 14 chhunga Aizawl-a Assam Rifles Recruitment Aizawl a neih turah tualchhung mite a tam thei ang ber sipai a lut tura an duhsak thu sawiin, hemi kawngah hian nasa taka puih an inhuam tih an sawi a, hemi atan hian Serchhip atanga sipai tang duh turte chu Serchhip atangin a thlawn vek-a Registration an tihsak theih thu an sawi a, tualchhung thalai te a tam thei ang he huna tel tur hian an sawm tih an sawi bawk a ni.

Nimin-a he hun buatsaih ah hian Silai chi hrang hrang leh ralthuam dang te zirlaite en theih tura phochhuah a ni.