Mipui ten uluk taka ngaihtuah a tul

Mipui ten uluk taka ngaihtuah a tul

Serchhip bialtu MLA, Lalduhoma chu ban a nih avangin Serchhip bial chu Assembly bye-election nei turin a inbuatsaih mek a, inthlanna neih hun tur hi hriatchian la ni lo mah se kan sawrkar lam mai bakah kan Political Party te ngawrh takin an inbuatsaih mek a, a mipui nawlpui te ti ti ber pawh a ni chho tan mek tawh a ni. Tuna a lan danah chuan kan rama Party lian pathum te bakah Party dang 2 te chuan he inthlanna hi chuh an tum dawn niin a lang a, Candidate 5 lai an awm dawn niin a lang a, he inthlanna neih tur hi chhan hrang hrang avangin Mizoram mipui te pawhin an ngaihven mek a ni.

He inthlanna atana Candidate puan chian tawh te hi an Campaign dan tur leh an au hla tur pawh a chiang chho tan viau a, mi tha tak tak leh bial chhung tan pawha mi tangkai thei tur tak tak vek an ni ngei dawn ni te pawhin a ngaih theih a, chutihrual chuan Serchhip bial mipuite hian heng mi tha tak tak te atang hian kan bial hmasawnna atana mi tangkai tur, kan bial min hmangaihtu leh kan hmasawnna tur tih takzet-a min ngaih-tuahpui theitu tur kan thlanchhuah a pawimawh dawn hle a ni.

Inthlang ram kan nih avangin kan Politician tam tak te chuan he inthlanna ah hian hnehna chan tumin an thiamthil chi hrang hrang nen kawng hrang hrangah beihpui an rawn thlak ngei dawn tih Serchhip Bial mipui te hian kan hriat a pawimawh hle mai. Amah-erawh chu mipuite hian inthlan dawna therhlo leh hamthatna eng eng emaw intiam leh in tih sak hian hmasawnna tak tak min hruai thleng lemlo tih hre chuangin kan Bial hmasawnna thlentu tur thlang turin ngaihtuahna uluk taka kan sen a pawimawh dawn hle a ni.