Aizawl Municipal Corporation (AMC) inthlanna Vawiin hian Ward 19-ah neih a ni dawn

Aizawl Municipal Corporation (AMC) inthlanpui vawi 3-na chu Vawiin hian neih a ni dawn a, he inthlanna neih tur atan hian inbuatsaihna pawh peihfel a ni tawh.

Mizoram State Election Commission ruahman angin AMC inthlan vawi 3-na hi Vawiin, February ni 16, 2021 hian AMC Ward 19-ah neih a ni dawn a, ruahman lawk ang chuan tukin dar 7:00 atanga tlai dar 4:00 thleng vote thlakna hun hawn a ni ang. AMC inthlanah hian Electronic Voting Machine hman a ni dawn a, mipui ten Vote an thlakna turin Polling Station 274 ruahman niin nimin khan inthlan buaipuitu tur, Polling Party te chuan inthlannaa hman tur EVM leh an mamawhte lakhawmin, Assembly Annexe atangin an duty-na hmun tur an pan hlawm a ni. Inthlana duty turte hian kar kalta Ningani leh Zirtawpni khan Postal Ballot hmangin vote an thlak tawh a, tukin dar 5:30-ah Polling Agent te hriatpuina in Polling Station tinah vote thlak chhinna, Mock Poll neih tur a ni a, zing dar 7:00 atanga vote thlak tanin, tlai dar 4:00 thleng hun hawn a ni dawn a, tlai dar 4:00 a vote la thlak hman lo, Polling Area-a thleng tawh si te tan Vote thlak hun hi pawhsei theih a ni ang.

Inthlanah hian hri leng laka him theihna tur kaihhruaina angin vote thlakna hmanrua te damdawi hmanga tihthianghlim vek a ni a, Polling Station-a luhna leh chhuahna-ah kut tihfaina dah vek tur a ni a, vote thlak tawhte an kuta chhinchhiahnana rawng hnawihna pawh mi pakhat tan a hrang theuh ruahman a ni bawk.

Tun tuma AMC inthlanna hi Ward 19-ah neih tur niin MNF, Congress leh ZPM te chuan heng bial zawng zawng hi chuhkim vekin BJP chuan bial 9 an chuh dawn bawk a, AMC inthlanah hian vote nei mipa 1,01,675 leh hmeichhia 1,17,195, a vaiin vote nei 2,18,870 an awm a, mipa aiin hmeichhe vote nei hi 15,520-in an tam zawk a, kum 2015 inthlan aiin vote nei 26,505-in an tam zawk bawk. He inthlanna atana hman EVM te hi Vote thlak zawh veleh dahkhawm a ni dawn a, February 18 khian Pachhunga University College-ah a ruala chhiar tur niin Feb. 22-ah he inthlanna buaipui ngai te hi zawhfel tura ruahman a ni.