Zirtirtu 150 chuang lak a ni dawn - Edn. Minister

School Education Minister, Lalchhandama Ralte chuan Mizoram sawrkarin zirna a dah pawimawh hmasa tih sawiin, “Zirtirtu indaihloh zualna School-te harsatna phuhruk nan zirtirtu 150 chuang lak a ni dawn a, heng te hi Managing Committee-in khawtual mi an lo rawihna tur a ni,” a ti.

School Education Minister, Lalchhandama Ralte hian nimin zing khan Zuangtui leh Thuampui Veng-a School te tlawhin sawrkarin Zirtirtu 150 chuang lak a phalsak vek tawh chu hrileng avangin lak mai theih a nih tak loh avangin tuna zirtirtu indaihlohna avanga harsatna lo sutkian nan hetiang hian ruahmanna siam a ni, a ti a. Managing Committee ten zirtirtu an rawihna tur cheng vbc. 157 pawh pawm fel a ni tawh tih a sawi bawk. 

Minister chuan khawtlang hmasawnna leh changkanna tur te, Aizawl khawpui changkanna tur leh Mizoram pum changkanna tur chu zirna a ni tih sawiin, High School sakna atan Thuampui khawtlangin ram an pe chu lawmawm a tih thu a sawi bawk.

School Education Minister hian nimin zing khan Zuangtui Adhoc Aided High School building sak that ngaite, Primary leh Middle School te chu an awmna mual leilung a chet avanga sawn ngai te a tlawh a. Govt. Thuampui Primary School te, Govt. Tej Singh Middle School, Thuampui te, Thuampui High School dinna tur ram te a en bawk a ni.