Mizoram-a Zirna In hawn tan anih dawn vangin hri laka himna tur thlirhona neih a ni

COVID-19 hri leng avanga hun engemaw chen Mizoram-a zirna In te khar a nih hnuah Vawiin January ni 22, 2021 atang hian zirna In thenkhat te chu hawn tan a nih dawn tak avangin Vawiin khan Health Minister, Dr. R. Lalthangliana hovin sawrkar mi pawimawh te an thukhawm.

He thutkhawm SAD Conference Hall-a neih ah hian Health Minister, Dr. R. Lalthangliana chuan kan dinhmun a him tawh viau nia kan inhriat avang hian kan inthlahdah palh ang tih a hlauhawm tih sawiin, tunhnaiah tualchhunga hri kai thar an awm leh tak nual avangin tumah inthlahdah lo ila, theihtawpchhuahin i fimkhur zel ang u, a ti a ni.

He thutkhawm ah hian Vawiin atanga zirna In thenkhat te hawn tan a nih dawn tak avangin School Education Department-in zirna In hrang hrangte zawm tura Standard Operation Procedure (SOP) a duan chu thlirho niin zirlai Hostel-a lut turte tan RAgT hmanga sample test vek a ngaih avangin an RAgT hmanga Sample Test-na tura Aizawl khawpui chhunga ruahman sa Bawngkawn leh Chawlhhmun ami chu mamawhna a san avangin tihpun a nih thu tarlan a ni a, Bawngkawn-ah sample test-na Booth pathum dah belh a nih thu leh Chawlhhmun-ah Booth pakhat dah belh a nih thu tarlan a ni a. Aizawl chhim lamah RAgT Kiosk dahna tur an hmuh zawh rihloh thu leh zawn mek zel a nih thu tarlan a ni bawk. R. Dengthuama Hall pawh January ni 31, 2021 atangin RAgT hmanga sample test chhunzawm theih turin ruahman mek a nih thu tarlan a ni bawk. He Meeting hian zirna In hawn a nih hunah Health Department in endik hna thawk se an ti a, zirtirtute zawng zawng pawh RAgT hmanga sample test tha an ti bawk.

He thutkhawm ah hian COVID-19 vaccine Covishield 16,500 dawn belh leh thu tarlan niin a vaiin 35,000 dawn a nih tawh thu tarlan a ni a, hei hian Health Care Workers zawng zawng a daih vek tawh thu tarlan a ni bawk a. Nimin atangin Champhai, Kolasib, Siaha leh Serchhip District-ah COVID-19 vaccine pek tan a ni a, nimin chawhnu dar 1:00 thleng khan Mizoram pumah Health Care Workers 2010 in vaccine dose khatna hi an dawng tawh a ni.

Nimin a thukhawm hian mipuite hnenah SOP hman lai mek chungchang leh thil pawimawh dang in hrilhfiah tula hriat a nih vangin Medical Operational Team ruahmanna in TV leh Radio kaltlangin zirtirna pek tha tih a ni. He thutkhawm ah hian sawrkar mi pawimawh hrang hrangte an tel a ni.