Tun thla chhungin COVID-19 Vaccine pek hman tum a ni

Serchhip District-a COVID-19 Vaccine pek tur, COVISHIELD Serchhip-ah rawn phurh thlen a ni ta a, tun thla chhunga Vaccine pe hman turin ruahmanna kalpui mek a ni.

Thudawn danin Sawrkar laipui in Mizoram-a COVID-19 Vaccine pek tura a rawn pekchhuah zingah Serchhip District atangin a thawhkhatna ah mi 450 te tan vaccine hi pek tura ruahman niin hemi tur hian nizan hmasa khan Dose 500 chu Serchhip rawn phurh thlen a ni a, Serchhip CMO Office-a Vaccination Store-ah dahluh nghal a ni.

Serchhip District Immunization Officer, Dr. Lalhlunpuii chuan tun tuma rawn thleng Dose 500 atang hian mi 450 te hnenah hri danna hi pek tur a ni tih sawiin, hei hi an tihdan phung pang-ngai a nih thu leh hri danna pek ah hian a thleng zawng zawng pek theih a ni thin lo tih a sawi a. Hri danna pek a nih hma hian tihtur hrang hrang an la neih thu pawh sawiin, hun remchang hmasa ah Media Sensitization Programme hman tur a nih thu leh hemi hnu hian District Task Force on Immunization chu thukhawmin hetah hian hri danna pek hun tur pawh hi tihchian a nih chauh tur thu a sawi a. Sawrkar in ruahmanna a siam ang chuan a thawh khatna atana hri danna pek tur hi tun thla chhunga pek fel tur a nih thu a sawi bawk.

Thudawn danin tun thleng hian Serchhip District atanga Vaccine la tur hian mi 2978 te hming chu thehluh fel a ni tawh a, heng te hi Health Care Worker mi 855 bakah Police lama thawk te leh Frontline Worker hrang hrangte an ni a, tunah hian vaccine pekna tur hmun hi thlithlai mek niin sawrkar laipui in kaihhruaina a siam zawm tur a awm avangin a remchan angin zirna In te pawh hman tura ruahman mek a ni.

Tun tuma COVID-19 Vaccine a rawn thlen rual hian Vaccine lak kawnga harsatna tawk an awm palh thulhah Vaccine pek thahna turin Adverse Event Following Immunization (AEFI) pawh rawn phurh thlen tel a ni bawk.