Siaha-ah MYC Coaching Centre hawng

Mizoram Youth Commission (MYC) hmalakna a MYC Coaching Centre siam thar chu nimin khan MYC Chairman, Dr. Vanlaltanpuia MLA chuan Siaha DRDA Conference Hall-ah a hawng.

MYC Coaching Centre hawnna hunah hian MYC Chairman chuan Competetive Exam-ah Siaha District chu Mizoram-ah an duailo hle tih sawiin, Coaching Centre neih chu an phu tih a sawi a. He Coaching Centre hawn atang phei chuan Siaha District atang hian IAS leh Central Service dang bakah, NEET leh SMATEE ah te pawh hlawhtlinna nasa taka an chan ngei a beisei thu a sawi a. Kum 2014 atang khan Mizoram atangin IAS tumah kan inziak tling tawh lo tih sawiin, “MYC hian IAS Mizoram atanga tlin tir leh hi kan thiltum lian tak pakhat a ni mek a ni,” a ti a. Mizoram thalai lekha thiam, IAS ni thei mai tur pawh State Service-ah an lungawi mai thin chu kan mutan pakhat a ni tih sawiin, kan tum te pawh kan tihsan a hun tawh takzet a ni, a ti bawk.

He hunah hian Siaha DC, Kesavan R pawhin Siaha-a MYC in Coaching Centre an hawng chu lawmawm a tih thu sawiin, hetianga Coaching Centre Sawrkarin a kalpui hi Tamil Nadu State-ah pawh 90's vel atang khan an lo kalpui tawh thu a sawi a, thingtlang khua leh chhungkaw harsa zawk atanga Civil Service Exam tumtute tan a tangkai em em tih a sawi bawk. MYC Coaching Centre atan hian Bazar KNP Building floor 2 chu man chawi-a luah a ni dawn a, a cheithatna leh bungraw mamawh te chu Dr. K. Beichhua chuan a MLA Fund atangin a tum dawn a ni.