Serchhip Mat Phai thlai chawmna tura leihnuai tui verhchhuahna Minister in a tlawh

Irrigation & Water Resources Department (I&WRD) Minister, C. Lalrinsanga hovin nimin khan Serchhip Mat Phai Mualvawm zau-a Thlai chawmna tura leihnuai tui lakchhuahna tura leiverh tawh enchhinna neih a ni a, hemi hnu hian Mat phai ruam-a thlai chianna hmun hrang hrang tlawhin kuthnathawktute harsatna enpui a ni bawk.

Irrigation & Water Resource Department in Thlai chawmna tura tui lakna tura lei an verh zawh tawh pakhat, a enchhinna tura ruahman ah hian Minister hian tui herhhaw-in an hnathawh tawh chin te a enpui a, hemi hnu-a Farmer Training Hall-a inkhawm tawi neih ah Minister chuan hun kalta a Irrigation Department in tuikawng a lo siam tawh tam takte chu la hman tlak mah se tuihna lo kam zel avangin tuilak tur zawk a lo vang tial tial tih sawiin, khawvel sik leh sa inthlakin min nghawng chho ve zel nia a lan thu a sawi a. Chu harsatna sutkina nana hmalakna pawimawh chu leihnuai tui, thlai chawm nana verhchhuah a ni tih sawiin, Lei hnuai tui siakchhuah hna hi Mat phai-a thlai chingtute tan liantham takin kalpui a ni dawn tih sawiin, tuna an verhchhuah chu chu a enchhinna ang deuh mai a la nih thu a sawi bawk.

Agriculture Minister chuan kan ram-a kan tharchhuah ve theih reng thlai kan la chaw lut nasa hle tih pawh sawiin, heng te hi keimahni ngeiin kan tharchhuah a, loneitute sum leh pai lakluh nasa zawka tihpun chhoh zel chu sawrkar thiltum lian tak a nih thu a sawi a, thlai chi hrisel intodelhna tura hmalakna te, thlai thar dahthatna lama hmalakna te a sawi bawk. Minister hian Mizoram-ah PMKSY hmanga Ground Water Irrigation Project 13, cheng nuai 1604.89 senna tur leh ram hactare 553 chawmna tur kalpui a nih tur thu te, Mat Phai zau bik tan pawh NABARD sum cheng nuai 227.15 senga hmun 31 a tui verh chhuah an tum thute a tarlang bawk a ni.

Nimin a he hun hman hi Road & Infrastructure Development Board Vice Chairman, Er. H. Lalzirliana MLA pawhin rawn hmanpuiin thlai tharchhuahna lama Mizoram-in hma a sawn theih nana Irrigation & Water Resources Minister thahnemngaihna leh inpekna chu ropui a tih thu a sawi a. Mat Phai-a loneitute taihmakna leh thawhrimna te chu hmuhnawm a tih thu leh an tana Ground Water irrigation hmalakna awm tur chu a lawmpui thu sawiin, a taka an hman theih hunah tangkai taka hmang turin duhsakna a hlan bawk.

Irrigation & Water Resource Department Secretary, Sangchhin Chinzah kaihhruai nimin a he hun hmanna ah hian I&WRD-a Chief Engineer, Er. Lalrotluanga chuan Technical Report pe in tuna leihnuai tui an verhchhuah, Minister in a tlawh sak chu leihnuai-a tui verhna khawl, kum 2019 a pahnih an lei thar enchhinna leh a ram neitu, R. Lalramliana (CMS) huana hman atan ni bawk sia an verh a nih thu a sawi a. Vawi thum an verhna ah feet 90 a thuk verhin feet 70 thlenga thukah a bang an zu siam thei a. Feet 50 velah tui pump-na khawl lang thei (submersible pump) zu thun lutin chumi hmang chuan tui thianghlim tha tak an pump chhuak ta tih a sawi a. A tlangpuia chawhrualin tui hi minute khatah litre 20 a pump chhuah theih a ni.

An verhna khawl hi New Holland Company in 4X4 Tractor a vuah theih tura a bika a siam niin, a bika siam Air compressor nena inthlunzawm tura duan a ni a. Meter 100, feet 330 thlenga thuk a verh thei a ni. Mat phaia thlai chingtute hman tur hetiang lei verh hi hmun 31 ah siam tum niin NABARD sum cheng nuai 227.15 an hmuh tawh thute, Expenditure Sanction nghah mek a nih thute a tarlang a,  chhungkaw 34, ram hactare 52 a zauva thlai chingtuten fur leh thlasik thlai an chinnaa an hman tangkai tur a nih thu pawh a tarlang bawk.

Hemi hnu hian Minister ho hian Chawm Zau leh a chhehvel zau hrang hrangte te tlawh chhunzawm a ni bawk.