Latest News

Serchhip District-ah COVID-19 Vaccination Dry Run hlawhtling taka neih a ni

COVID-19 hri danna pe tura inbuatsaihna kalpui mekah nimin khan Serchhip District chhunga hmun thum (3)-ah hri danna pek dan tur enchhinna, COVID-19 Vaccination Dry Run neih a ni.

Serchhip District-a COVID-19 Vaccination Dry Run hi Serchhip District Hospital-a Eye Ward bakah Midland M/S leh Govt. Chhiahtlang M/S-ah te neih a ni a, heng hmunah te hian hri danna dawng tura ruahman lawk mi 25 zel kovin hri danna pek dan tur a tak anga enchhinna neih a ni a, hri danna pe tur hian Team hrang hrang siam niin Team pakhat-ah hian mi pariat (8) zel awmin Vaccinator mi panga bakah hri danna la turte an nihna lo enfiahtu tur mi pahnih zel leh venhimna hna thawktu tur Police mi pakhat zel an awm dawn a, Vaccine hi ala rawn thleng lo thung a ni.

Nimin-a COVID-19 Vaccination Dry Run neih hi Serchhip CMO, Dr. Laldawngliana Sailo leh District Surveillance Officer, Dr. Lalhlunpuii te chuan telpuiin hri danna pek dan tur hi a tak anga kalpui a ni a, he hun hi Serchhip District Bawrhsap leh District Vaccination Officer, Kumar Abhishek chuan a hmunah kalin a enpui bawk a, Health Department in he Dry Run nei tura an inbuatsaihna chu tha a tih thu a sawi bawk.

Serchhip District-ah hian COVID-19 Vaccine pe tur hian inbuatsaihna engkim peihfel a ni tawh a, tunah hian sawrkar laipui in ruahmanna a siam angin Health Care Workers mi 851 te chu a thawhkhatna-a hri danna pek turin an hming thehluh fel a ni tawh a, heng zingah hian Health Department hnuaia thawk damdawi In enkawltute, Police Department-a thawk te leh Frontline Workers dang te bakah Anganwadi Workers leh Veng leh khaw hrang hranga ASHA te an tel a, Health Department-a thawktute chuan hri danna la hmasa tura thehluh Health Department-a thawktute zingah hian Office lama thawk te an telloh thu leh damlo enkawlna kawnga thawk te an ni ber tih sawiin, a tira tello Chief Medical Officer (CMO) leh District Surveillance Officer (DSO) te chu rawn telh belh leh an nih thu an sawi bawk.

Comments

Chhiar Hlawhte