Latest News

Serchhip District-a Health Care Workers te hnenah Vawiin atangin COVID-19 vaccine pek a ni dawn

Serchhip District chhunga COVID-19 Vaccine dawng hmasa ber turte hnenah Vawiin, January 21, 2021 chawhma dar 10:00 hian hri danna pek tan a ni dawn a, ni 2 chhung hri danna hi pek phawt tura ruahman niin hemi chhung hian Health Care Workers mi 450 te hnenah hri danna hi pekchhuah a ni dawn a ni.

Serchhip District-a COVID-19 hri danna pek tur chungchangah hian nimin khan District Immunization Officer (DIO) leh Serchhip District Level Task Force on COVID-19 Vaccination-a Member Secretary, Dr. Lalhlunpuii chuan Serchhip-a tualchung thuthar thehdarhtute chu Serchhip CMO Office-a Main Centre-ah kawmin an ruahmanna te a hrilhfiah a. He hunah hian Dr. Lalhlunpuii chuan tunah hian Serchhip District-a COVID-19 hri danna pek tur Vaccine, COVISHIELD Dose 500 a rawn thlen tawh thu leh hei hi vials 50 a nih thu a sawi a, tun tumah hian mi 450 hnenah hri danna hi pek a nih dawn thu leh Vaccine rawn thleng atanga Dose 50 (10%) chu a chhe palh venna atan dahthat rih tur anih thu a sawi a. Ruahman lawk ang chuan Vawiin atang hian Serchhip-ah hri danna hi pein Midland M/S leh Presbyterian English School-ah te Vaccination Side siam a ni a, hetah hian mi 100 ve ve hnenah hri danna hi pek tur a ni dawn tih a sawi a, naktuk-ah hri danna hi pekchhuah chhunzawm tur a nih thu pawh sawiin, Thenzawl CHC hnuaiah mi 100 hnenah pawh hri danna hi pek tur a nih thu leh PHC te erawh chuan tun tumah hian hri danna pek ala nih dawnloh thu a sawi a. Tun tuma hri danna dawng hmasa turte hi Health Care Workers te an nih thu a sawi bawk.

COVID-19 Vaccine pek tur, COVISHIELD chu Serum Institute of India (SII) siam a nih thu sawiin, mi tam takah enchhinna neih ni tawhin hlauhawm loh tura ngaih a nih thu a sawi a, hri danna chi hrang hrang pek a nih reng rengin insawiselna, a bikin khawsik, lu na leh luhai te a awm thin thu leh COVID-19 Vaccine pek ah pawh hetiang hi a awm theih thu a sawi a, tuna Mizoram-a hri danna pek te zingah pawh hetiang hi an awm thu leh ngaihtuahawm erawh an awm loh thu a sawi a. Hri danna dawng tur hian intihluihna a awmloh thu leh Naupai mek te, nausen hnute pe lai leh kum 18 hnuailam te chu Vaccine la pek rihloh tur thu a sawi bawk.

He hunah hian Serchhip District bialtu WHO Consultant, Dr.Lalit Sarode chuan India ramah vaccine chu mi nuai 6 chuang hnenah pek ani tawh tih a sawi a, chung zingah chuan a thalo zawnga nghawng liantham nei an la awmloh thu sawiin, insawiselna tenau nei hmun thenkhatah awm ve bawk mahse chu chu thil pangngai anih thu a sawi a, Sawrkar laipui in vaccine chi hnih a pawm, Covishield leh Covaxine te chu uluk taka enchhin anih angin a hluhawmloh tih a sawi.

A sawi zelna ah vaccine chu virus thahna anilo tih sawiin, tunhnaia COVID-19 hri chhuak thar lakah pawh vaccine hian a hnathawh pangngai renga a thawh dawn thu a sawi. Tunah hian vaccine chi 250 vel enchinna kalpui mek ala awm thu sawi bawkin, kumin chhung hian Mizoram-ah Vaccine stage 3 pek zawh hman tum anih thu leh nakum lam atangin mipui nawlpuiah pekchhuah hman ngei an tum tih a sawi a, hemi chhung hian mipuite chu hri laka him theihna turin midang nen-a inhnaih lo tur te, Hmai tuamna hmang uluk tur leh kut silfai te ngai pawimawh chhunzawm reng turin a chah bawk.

He hunah hian Serchhip Main Centre-a Health Supervisor, Vanlalrawni pawhin COVID-19 hri danna pe tur hian Dry Run chu hlawhtling taka neih a nih tawh thu a sawi a, hetah hian hri danna dawng turte lo enfiah dan tur te, Vaccine dawng zingah insawiselna lo nei palh an awm thulh pawha enkawl zui dan turte thlenga tihchhin a nih tawh thu a sawi bawk.

Nimin vek khan hri danna petu tur, Health Worker te chu an hnathawh dan tur hrilhfiahna hun buatsaih nghal a ni bawk.

Comments

Chhiar Hlawhte