Electoral Roll thar tlangzarh niin Serchhip District-ah Vote nei thei 52,137 an awm

Kumin January ni 1-a kum 18 tling chin te laa Electoral Roll siamthat hna chu zawhfel niin nimin khan Final Electoral Roll chu tarchhuah a ni a, Serchhip District pumah Vote nei thei 52,137 awmin heng zinga 401 te chu Service Voters an ni.

Serchhip District-a Electoral Roll siam thar hi Serchhip District Election Officer, Kumar Abhishek chuan Serchhip Meeting Hall-ah tlangzarhin kumin (2021) January ni 1-a kum 18 tling chinte chu Electoral Roll-ah hian thun an nih thu sawiin, Roll tha leh fel fai tak kan neih theih nana rim taka thawktu Election Branch, BLO, ERO, AERO leh Party hrang hrang te, tlawmngai pawl te chunga lawmthu a sawi a ni.

He hunah hian Serchhip Election Officer, Vanlalhmachhuana chuan Electoral Roll thar dinhmun tlangpui leh an hnathawh dan te a tarlang a, tun tum Special Summary Revision neih chhunga voters punna hi Serchhip bial-ah voters 666, Tuikum bial-ah voters 279 leh Hrangturzo bial-ah voters 218 niin District pum-a Voters punna chu 1163 a ni a, za zela 2.30% pung ang a ni. Serchhip District chhunga Assembly Bial pathum-ah hian mipa voters aiin hmeichhe voter an tam zawk vek a, District Gender Ratio chu 1053 niin Elector Population ratio chu kum 2021-a mipui awm tur zat ngaihruatna (projected district population 2021) atanga chhutin 625 a ni bawk.

Electoral Roll thar ber atanga a lan danin Serchhip District-ah Assembly Constituency pathum- 26-Serchhip (ST) AC, 27-Tuikum (ST) AC leh 28-Hrangturzo (ST) AC te awmin Polling Station 81 a awm a, District pumah Vote nei thei mipa 25,594 leh hmeichhia 26,543, an vaiin Vote nei thei 52,137 an awm a, mipa aiin hmeichhia vote nei thei hi 949 in an tam zawk a, Vote nei thei zinga mipa 399 leh hmeichhia 2 te chu Service Voters an ni. 26-Serchhip (ST) AC-ah Polling Station 26 awmin General Voters mipa 9102 leh hmeichhia 10,194 an an vaiin Vote nei thei 19,296 bakah Service Voters 190 an awm a. 27-Tuikum (ST) AC-ah Polling Station 27 awmin General Voters mipa 8080 leh hmeichhia 8217, an vaiin 16,297 bakah Service Voters 118 an awm a, 28-Hrangturzo (ST) AC-ah General Voters mipa 8013 leh hmeichhia 8130, an vaiin Voters 16,143 bakah Service Voters 93 an awm bawk a ni.

Nimin-a Electoral Roll thar tarchhuah hi Serchhip District chhunga Political Party hrang hrangte hnenah semchhuah nghal a ni a, he hunah hian zawhna chhangin Election Official te chuan Serchhip Assembly bial-ah bye-election a awm dawn nia a lan avangin Electoral Roll siamthat hna zawhfel a nih hnua Continuous updation-ah fimkhur taka kalpui a ni dawn tih an sawi a, a bikin inthlanna a Vote thlak duh avanga insawn tum an awm theih avangin Dan anga fimkhur taka an kalpui tur thu an sawi bawk a ni.