Latest News

Serchhip District chhunga Kangmei Venna Hapta hman dan tur ngaihtuah a ni

Kumin-a Serchhip District-a Kangmei Venna Hapta, ‘Fire Prevention Week’ hman dan tur chungchang ngaihtuahin nimin khan District Level Fire Prevention Committee chu an thukhawm.    

    Serchhip DC Meeting Hall-a District Level Fire Prevention Committee thutkhawm hi an Chairman Serchhip DC, Kumar Abhishek IAS chuan kaihruaiin ‘Fire Prevention Week, 2021’ hawnna hun chu thla thar, February 8, 2021-ah State Level Committee in a hman rualin hman ve nise an ti a, he hunah hian nikum chhunga ramkang venna kawnga titha khuate hnenah lawmman semna neih tura ruahman a ni. Kumin-a Lo hal hun tura State Level Committee in a lo duan tawh, March ni 15 aia tlai lo-a Lo hal tura tih chu Serchhip District-ah pawh khauh taka kalpui rel a ni a. Khaw tina Village Level Fire Prevention Committee te chu nasa zawka ramkang venna kawnga lo inhmang tur leh inzirtirna pawh anmahni khua ah te nasa lehzuala lo kalpui theuh tura hriattir nise tiin a rel a ni. Hei bakah hian ramkang laka invenna lam hawi inzirtirna chi hrang hrang te pawh nasa lehzuala kalpui nise, Media hmanraw hrang hrang te tangkai taka hman nise an ti bawk.

Kumin-a Fire Prevention Week hman turah hian thupui atan ‘Kangmei tichhuak lo turin mitin i fimkhur ang u’ tih chu hman a ni dawn a, nimin-a thutkhawm ah hian Thenzawl DFO leh District Level Fire Prevention Committee-a Member Secretary, Margaret Lalramchhani chuan nikum chhunga kangmei venna kawnga Serchhip District chhunga hmalakna hrang hrangte tarlangin, nikum chhungin COVID-19 hri leng avangin hmalakna neih a harsat thu a sawi a, hri leng avanga ei leh bar a intodelh duhna avangin mi tam takin Lo nei thar in Chul te an rit nasa tih sawiin, hei hian kangmei chhuak a thlentir nasa tih a sawi a, kumdang angin kangmei chhuak chu tam angin langlo mahse a kan zau zawng erawh a nasa zawk tih a sawi a. Nikum chhung khan Serchhip District-ah kangmei tum 119 a chhuak tih tarlangin, heng zinga 95 chu Lo hal avanga chhuak niin mimal ram kang 24 a awm tih a tarlang bawk. Nikum chhungin hri leng avangin kangmei venna kawnga hma la tha thlanna pawh neih mumal theih a nih loh thu pawh he hunah hian tarlangin, Fire Fighting Squad pawh VC area hrang hrangan din a nih thu a sawi bawk a ni.

Comments

Chhiar Hlawhte