Chanchin thar thenkhat :

Inkhawm thei zat ti danglam

Mizoram sawrkar chuan hri leng avanga inkhuahkhirhna kalpui mekah Pathian Biak inkhawm a tel thei zat bithliah chu a ti danglam. Hemi chungchanga Sawrkar thuchhuah chuan Sakhaw biakna In te chu Feb. 1, 2021 atangin inkhawm nan hawn theih a nih thu leh amaherawh chu, tum khatah mihring leng zat zaa 50 (50%) aia tam punkhawm loh tur a nih thu leh Zan lama inkhawm erawh khap rih a ni tih a tarlang a, a hmaa mi 200 aia tam lo inkhawm theih tih chu paih a ni ta thung a ni. Hei bakah hian Sunday School chu pawl-a inthen lovin Pulpit atangin emaw khaikhawm tur a ni a, inkhawm zawng zawngin Face mask vuah theuh tur a nih bakah inkhawm chhungin zai loh tur a ni bawk ang. Mipui punkhawmna hmunah te hian COVID-19 inkaidarh a nih loh nan invenna atana inkaih-hruaina (SOP) siam chu tha taka zawm tur a ni a. Kohhran mite himna tura SOP duante hi tha taka zawm a nih theih nan Kohhran tin ten 'SOP Implementation Committee' an ruat dawn a ni.

FOCUS hmalakna te hawng

East Tuipui bialtu MLA leh Bamboo Link Road Board Vice Chairman, Ramthanmawia chuan nimin khan Khuangleng khuaa Sial vulhtute hmalakna tlawhin FOCUS Project First Installment kaltlanga AH&Vety Department in ‘Mithun Shelter-Community Level and Water Supply Facility for Grazing Area’ hnuaia Se In an sak, a vengtute chawlhbuk sak leh tuipekna Thiltengaw leh Sihpuia siamte hman theih turin a hawng.

Journalist damlo tanpui dawn

Mizoram Journalist Welfare Scheme (MJ-WS) Governing Board chu nimin khan an Chairman I&PR Department-a Commissioner & Secretary, Sangdingliana hovin an thukhawm a. He Meeting hian MJWS hnuaia Journalist damlo ten damdawi-a inenkawlna senso atan tanpuina an dilna te thlirin, nikum October leh kumin January thla inkara dilna lut 5 zingah mi 4 chu tanpuina pek tura tihfel a ni.

ZPM in Nomination File

Thla thar February 16-a Aizawl Municipal Corporation (AMC) inthlanna neih tura ZPM Party Candidate te chuan nimin khan Nomination Paper an thehlut a, ZPM Party hian AMC inthlanna Ward 19-a neih turah hian Party mal in Seat awm zawng zawng an chuh vek a, he hunah hian an party hruaitu ten an Candidate te hi an tawiawm a ni. ZPM Party chuan Aizawl Municipal Corporation (AMC) huamchhung mipuite chu AMC inthlanna lo awm turah an Candidate te Vote theuh turin an ngenin an sawm tih thuchhuah siamin an tar-lang bawk a ni.

Campaign hawnna nei

Aizawl Municipal Corporation (AMC) inthlanna neih tur atan Party hrang hrang ten Campaign ngawrh takin an kalpui mek a, MNF Party chuan nimin khan AMC Ward No. XVIII leh AMC Ward No XVII-ah Campaign Kick-off an nei a, an Party hruaitu ten an hmanpui a ni. Hetihlai hian Congress Party pawhin niminpiah khan AMC Ward No. XVIII-ah hian Campaign Kick-off neiin he hun hi MPCC General Secretary, TT. Zothansanga bakah Party hruaitu dang ten an hmanpui bawk a, MNF sawrkar thunun theihloh sawrkarna siam tur thlantlin a tul thu te an sawi bawk.