Sawrkar School te tih hmasawnna turin ‘School Chhawm rawh’ tih kalpui tura hawn a ni

Serchhip District chhunga sawrkar School te tih hmasawna zirlai naupang nei tam thei tura ‘School Chhawm rawh’ (Adopt a School) tih thupui hmanga hmalakna tur chu nimin khan Serchhip District chhung School 5-a kalpui turin District Bawrhsap, Kumar Abhishek IAS chuan a hawng.

Serchhip DC’s Conference Hall-a ‘Adopt a School’ tih tlangzarhna hunah hian District Bawrhsap, Kumar Abhishek chuan ‘School Chhawm rawh’ tih ruahmanna kalpui tura a ngaih pawimawh zual tarlangin, mipuiten kan khuaa sawrkar School te chu tun aia neitu thinlung pu zuala, mahni ta a nih anga a tulna apianga chhawmdawl leh tanpuia, ngaihven lehzual nan te, District chhunga zirna dinhmun tha zawk kan neih theih nan te leh hmanrua leh School mamawh zualpui te phak ang tawka kan inngaihtuahpui zel theih nan he ruahmanna hi duan a nih thu a sawi a. A naupan laia sawrkar School-a kal ve thin tho a nihna atanga a tawnhriatte chuan a rilru a luah reng tih sawiin, IAS a zawm tirh atanga a thil tum langsar zingah a phak tawka zirna tihhmasawn zel a nih thu a tarlang a. A vawikhatna atana Sikul Chhawmtu tur Officer te chu an School thlan tlawh nguna, vil uluka an theihna apianga tanpui tlat turin a chah a ni.

Bawrhsap hian sum awmsa engmah a awm chuang lova nimahsela a theih chen chenah convergence te dap a ni ang tih sawiin, Corporate Social Responsibility (CSR) sum te pawh dap theihna tur chi a awm chuan dap a ni ang, tiin he hmalakna kalpui dan tur thenkhat a tarlang a, School tihhmasawn nan pawisa a pawimawh ber lo theia, thawktute leh naupang leh khawtlang inpekna ten nasa takin thil a thlak danglam thei a ni, tiin Bungtlang M/S, Govt. Thenzawl H/S, Govt. Oriental M/S, Khumtung P/S leh E Lungdar P/S-II te chu School Chhawm tura thlan an nih thu a puang a ni.

He hunah hian Serchhip DC Office-a SDO (Sadar), C. Lalduhzuali chuan he hmalakna bul lo tan dan te sawiin, he hmalakna hi sawrkar laipui ruahmanna emaw, State sawrkar in kalpui tura a tih vang emaw a kalpui tur ni lovin District Level-a duanchhuah leh kalpui tur a nih thu a sawi a. Mizoram-ah Sawrkar School leh Private School te dinhmun a inthlau tial tial tih sawiin, sawrkar School-ah zirlaite pawh an tlem tial tial tih a sawi a. Hei vang hian Sawrkar School ten hma an sawn theih nan School Management Committee (SMC) te leh sawrkar Department te nen tangtlangin Serchhip District chhungah Model School panga (5) thlangin he hmalakna hi kalpui tur a nih thu a sawi bawk.

Serchhip SDO (Sadar) chuan he hmalakna hnuaia School thlan te chu hma an sawn dan uluk taka enzui a ni dawn tih sawiin, kum khat chhung an kalpui dan thlirin kalpui zui zel chi a ni em tih ngaihtuah leh a nih tur thu a sawi a. He hmalakna ah hian hmuh theih- School building leh Classroom te bakah hmuh theihloh lamah Zirtirtu te training pek leh intuaihriam bakah thahnem ngai lehzuala hna an thawh theih nana hmalakna turte pawh a tel thu a sawi bawk.

Serchhip Addl. DC, Lalmuansanga Ralte kaihhruai he hunah hian Serchhip District Education Officer, Zohmangaihi chuan thawhpui te chungah lawmthu a sawi a, Serchhip District chu Mizoram laili a awm leh Minority ten an chen pawlh lutuk lohna a ni tih sawiin, amah-erawh chu District dang ang bawkin Zirlai naupang ten an zirna mamawh engkim a thlawna an dawn theihna Sawrkar School-ah te chuan Zirlai naupang inziaklut an tlem tial tial tih a sawi a. Hei vang hian Sawrkar School tam tak chu khar a ngaih phah hial tih a sawi bawk.

Nimin-a he hun hmanna ah hian North Vanlaiphai SDO (Civil), Dorothy Muansangi; Serchhip BDO Vanlalhmachhuana leh East Lungdar BDO, H. Lalhruaitluanga te pawhin thu an sawi bawk.