Latest News

Retailer ten buhfai thalo an dawng a nih chuan Kudam-ah a tha in a thleng theih - Supply Minister

Supply Minister, K. Lalrinliana chuan Retailer ten buhfai thalo an dawng palh a nih chuan Kudam-ah a tha a thleng theih a ni tih a sawi.

Supply Minister K. Lalrinliana hian nimin khan Zuangtui-a Supply Kudam chu tlawhin tunhnaia retailer thenkhatin buhfai thalo an dawng nia sawi a awm avangin FCI atanga buhfai dawn leh Open Free Market atanga buhfai lei te a dinhmun en thlithlai tha a tih avanga Kudam hi tlawh a nih thu a sawi a. Uluk taka a en hnuah Minister chuan heng buhfai te hi a tha thawkhat tih a sawi a, buhfai ip sang tam tak zingah a chhia bag hnih khat a awm palh thei a, heng te hi retailer thenkhatin an lo dawng palh a ni thei a, mahse chutiang an lo dawng palh a nih chuan buhfai thalo hi chu Retailer ten kudam-ah a tha in an thleng thei reng a, thleng tur pawhin hrilhhriat an ni, a ti.

Minister hian Zuangtuai Kudam-a FCI-in an hman ang Leotronics company siam Weighbridge dahna hmun tur pawh a en nghal a. Thawkkhat lai khan FCI atanga buhfai lak Zuangtui Kudam-a buk lehin a in mil theilo tih hmuhchhuah a ni a, ama ho ngei pawhin nikum khan hei hi an finfiah tawh tih sawiin, Weighbridge hman thin chu hman tlakloh a nih avangin Weighbridge thar dah turin hma lak mek a ni, a ti a. Weighbridge thar, Leotronics company siam chu order ni tawhin bun vat beisei a nih thu a sawi bawk. Zuangtui Kudam hlui tawh sak thatna tur NABARD sum dil mek a nih thu leh Kudam ramri chin hung turin hmalakna a kal mek thu a sawi bawk a. Sawrkar tharah Mizoram khaw hrang hrangah Kudam 10 sak zawh tawh a nih thu leh a dang 21 te sak mek a nih thu pawh Minister hian a tarlang bawk a ni.

He hunah hian Supply Department Director, Dr. Lalhriatzuali Ralte chuan buhfai quality endik hna chu Monitoring Committee in a uluk taka enin an vil reng thu a sawi a, a khat tawkin Sample te la in Food Testing Laboratory-ah te pawh kan test tir thin tih a sawi bawk.

Comments

Chhiar Hlawhte