Serchhip bial-a bye-election neih turah C. Lalramzauva’n din a tum loh thu a sawi

Adviser to Chief Minister leh Sr. Advocate, C. Lalramzauva chuan nimin khan Serchhip Press Club-ah thuthar thehdarhtute kawmin Serchhip bial-a Assembly Bye-election lo awm turah din a tum loh thu leh a beisei loh thu sawiin, an Party hruaitu ten tu pawh dintir se thlantlin a nih theih nan tanlak a tum thu a sawi.

Nimin-a Serchhip Press Club-a thuthar thehdarhtute a kawmna hunah hian Adviser to Chief Minister, C. Lalramzauva chuan Serchhip bialtu MLA atana thlantlin Lalduhoma chu Anti-Defection Law bawhchhiat avanga ban a nih avangin he Bial-ah hian bye-election awm thuai tura ngaih a nih thu sawiin, amah ngei pawh Serchhip bial-a tum 4 lai lo ding ve tawh a nih avangin he inthlanna lo awm turah hian ding leh tura ngaihna a awm mai thei tih a sawi a, amaherawhchu MLA a ni emaw, MLA a ni lo emaw chuan Serchhip bial tana thil tha tur a ngaihtuahna ah kawngro a su lo tih sawiin he inthlanna lo awm turah hian din a tum loh thu leh a beisei loh thu sawiin, an Party hruaitute pawhin an din tir lo a nih chuan lunghnurna a neilo tih a sawi a, an Party hruaitu ten tu pawh din tur se a tlin theih nan tan a lak tur thu a sawi a. He inthlanna a an Party Candidate tur chungchanga thuthar thehdarhtute zawhna chhangin, Candidate siam chungchangah an hotute an hmanhmawh loh thu leh AMC inthlanna neih a nih dawn bawk avangin ngaihtuah tur tam tak a awm thu a sawi a. Hun rei tak he bial lo vil tawhtu a nih avanga tlawmngai tura nawr na awm thei chungchanga zawhna chhangin, tlawmngai tura an nawr tlat a nih chuan tih theih a nih thu leh amaherawh chu hetiang hi chu a nih a rinloh thu a sawi bawk.

Tunhnaia mi tam takin MNF Party nen-a an sawizawm Michael Chhakchhuak chungchanga zawhna chhangin Adviser to Chief Minister, C. Lalramzauva chuan MNF anga a inchhal a nih chuan sawi theih a nih loh thu leh an Party mi leh sa leh Block hruaitute nen chuan engmah an ti tlang lo tih a sawi a, MLA Candidate nih tum chu tu tan pawha thil theih a nih thu leh thilpek sem te pawh a theih vek thu sawiin, Michael Chhakchhuak chu MNF Official Candidate ang chuan a din loh tur thu a sawi bawk.

Serchhip bial-a bye-election neih turah an Party hruaitu ten Serchhip bial tana tha ber tur an rawn ruat ngei ang tihah MNF mipuite chu an lungrual tlang tih sawiin, “Tunah chuan khaw-var hnu a inthlang tur kan ni tawh a, mipuite pawhin kan duh zawng kan thlanna turah engkim hre sa leh hmu tlang sa in vote kan thlak dawn a ni a, engemaw ti zawng taka ngaihtuah chuan Exam question hresa a lehkhabu nen inchhawp chunga chhang tur te pawh kan ang deuh rum rumin ka hria. Chuti chunga kan la thlang sual fo a nih chuan a mawh chu kan chungah a tla ve ngei ang le,” a ti.

Serchhip bialtu MLA atanga ban tak Lalduhoma chu Serchhip bial mipui ten kan lo khawngaihin kan lo Vote tling tawh tih a sawi a, “Amah ngeiin kawng diklo min zawh san leh tak si avang leh hmingchhe taka MLA a nihna ban tir ngai khawpa hre reng chunga humsual a lo dai luih tak si ah chuan Serchhip bial mipui ten kan umzuia kan khaw-ngaih lehna chhan tur sawi thiam a har hle tawh a ni,” a ti a. “Tun tumah hi chuan Pu Lalduhoma khawngaih vang emaw, huat vang emaw a vote thlak lovin bialchhung mipuite hian keimahni inhmangaihna chang hria a khawngaihthlak tak dinhmuna kan din tawh lohna turin ngaihtuahna hmang thiam ila, keimahni tana tha turin lungrual takin MNF candidate tur chu tupawh nise theihtawp chhuaha mahni tanghma ngaia lo thlawp turin Serchhip bial mipui te MNF party aiawhin ka ngen a che u,” a ti bawk.

He hunah hian amah tawiawmtu MNF East Block President, C. Vanlalsiamthara chuan Serchhip bial-a bye-election neih turah an Party Block chuan Candidate chungchang ah party thuneitu sang nawr an tum loh thu leh an rawn dah apiang chu lawm taka pawm an tum thu a sawi bawk a ni.