Latest News

A ni khatna ah Serchhip District-a Health Care Workers mi 131 te COVID-19 Vaccine pek an ni

Nimin khan Serchhip District chhunga Health Care Workers te hnenah COVID-19 Vaccine, Covisheild chu pek tan a ni a, Serchhip District-ah hian Serchhip District Hospital-a Medical Officer leh TrueNat Laboratory Incharge, Dr. K. Lallawmzuala chu Vaccine pek hmasak ber niin nimin, a ni khatna ah khan mi 131 te hnenah Vaccine hi pek a ni.

Serchhip District-a COVID-19 Vaccine, Covisheild pek bultanna pual hian Presbyterian English School Serchhip Assembly Hall-ah inkhawm tawi neih niin he hun hi Serchhip District Bawrhsap leh District Health Society-a Chairman, Kumar Abhishek IAS chuan hmanpuiin nikum kumtir lam atangin COVID-19 hripui vangin kan buai em em a, khawvel hmun tin a hrut chhuak a ni ber a. Chutianga boruak rit tak kan tawrh tawh hnuah vaccine kan nei ta chu lawmawm a tih thu leh Vaccine pek bultanna ni chu ni chhinchhiah tlak tak a nih thu a sawi a. Hripui laka kan him theih nana hah taka thawktu Frontline Workers ten hri danna an dawng hmasa chu a lawmpui thu sawiin, mipui nawlpuiin Vaccine kan dawn theiha, he hrik kan umbo hma chu an inpekna leh thahnemngaihna kan la mamawh reng dawn tih sawiin, tha thlah lova hripui do kawnga bei zel turin a chah a ni.

He hunah hian Serchhip leh Lunglei District-a WHO Consultant, Dr. Lalit Dinkar Sarode pawhin Covisheild vaccine chu tunah hian India mipui nuai riat velin an dawng tawh tih sawiin, engmah hlauh tur a awm lo tih a sawi a. Chutihrualin, vaccine kan lak tawh vanga COVID-19 laka himna dan hrang hrangte namnul mai chu a thiang chuang lo tih a sawi bawk.

He hun hi Serchhip CMO, Dr. Laldawng-liana Sailo chuan kaihruaiin COVISHIELD chu nu naupai mek te, hnute hne lai pawm te leh Allergy (damdawi huat nei) nasa te tan lak theih ala nih loh thu sawiin, hei pawh hi enchhinna la neihloh vang a nih thu a sawi a, Thisen sang leh Zunthlum lam nei te pawhin hri danna hi an la tho a, engmah harsatna an neih pui chuang lo niin a lang, a ti.

Serchhip District-ah hian nimin khan COVID-19 Vaccine hi Presbyterian English School leh Midland M/S-ah te pek niin Presbyterian English School-ah hian Serchhip District Hospital-a Medical Officer, Dr. K. Lallawm-zuala chu vaccine pek hmasak ber niin Midland M/S-ah hian Dr. K. Vanlalhriati, Medical Officer chu pek hmasak ber a ni bawk a, hemi hnu hian Health Care Workers ten Vaccine hi la chhun-zawmin nizan dar 6:00 thleng khan mi 131 hnenah Vaccine hi pek niin Presbyterian English School ah mi 65 leh Midland M/S-ah mi 66 te hnenah Vaccine hi pek a ni.

Ruahman lawk ang chuan COVID-19 hri danna hi Vawiin ah pek chhunzawm leh a ni dawn a, nimin-a hri danna pekna hmun pahnih te bakah hian Thenzawl CHC-ah pawh Vawiin hian hri danna hi pek tura ruahman niin tun tumah hian mi 450 te hnenah hri danna hi pek tura ruahman a ni a, ni 28 hnuah Dose 2-na pek leh tura ruahman sa a ni bawk.

COVID-19 hri danna pekna hmunah hian Police ten venhimna hna thawkin Health Worker ten Vaccine hi an pe a ni.

Comments

Chhiar Hlawhte