Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Party hrang hrang ten kumin atan Aizawl-a an Party Office hawnna hun an hmang

Mizoram-a Political party lian pathum- MNF, Congress leh ZPM te chuan kumin atan Aizawl-a an Party Office te chu nimin khan an hawng leh tan ta.

MNF party chuan kumin, 2021 atana Aizawl-a an party Office, Mizo Hnam Run hawnna hun nimin khan buatsaihin he hun ah hian an Party Vice President, Lalthlengliana chuan kum 2020 liamta ah khan Covid-19 vangin harsatna nasa tak sawrkarin a tawk tih sawiin, he hrileng karah hian Pathian Malsawm tlakin Mizoram Sawrkarin hna a thawk tih a sawi. AMC leh Serchhip bial by-election chungchang sawiin MNF Vice President chuan, “February thla ah AMC kan inthlang leh dawn a, Local Council-ah 83% latute kan ni a. Candidate la puan ni lo mahse Green Signal pek vek tawh an ni. An tha theh thawh hle a, AMC-ah pawh kan sawrkar leh dawn a ni. Serchhip bial-ah By-election kan nei leh dawn a. Mipui khawngaih hlawh tuma insawi khawngaihthlak chawp an awm mek a. Keini chuan kan hnathawh tur kan sawi ang. He by election-ah pawh hian kan chak leh ngei dâwn,” a ti bawk.

Congress Party pawhin Aizawl-a Congress Bhavan hawnna hun nimin khan neiin he hunah hian AMC inthlanna lo awm tura an Candidate turte an puangchhuak nghal a. He hunah hian MPCC President, Lal Thanhawla chuan thu sawiin, ram sum leh pai enkawlna kawngah Congress sawrkar kha Pathian zarah an che tha thawkhat viau tih sawiin, Sawrkar hnathawk hlawh puksak an nei ngai lo tih a sawi a, “GPF, Pension leh Bill hrang hrang kan pe thei zel,” tiin “MNF Sawrkar thar pawh hnathawhna tur cheng vaibelchhe tam tak kan hnutchhiah a ni. Chuti chung chuan kum 2 chhung lekin Mizoram sum leh pai dinhmun an tichhe vek,” a ti bawk.

ZPM Party chuan Aizawl-a an Office chu nimin khan kumin atan an hawng tan leh ta a, Party Office hawnna hunah hian an Party hruaitu ten thu an sawi a ni. Nimin a ZPM Party Office hawnna hunah hian ZPM President, Lalliansawta chuan Zoram hmun hrang hranga ZPM Party mi leh sa te chibai bukin, “Kalphung thar vuantute kan ni a, kan chetzia leh awmdan ah chu chu kan tihlan a ngai a, ram rorelnaa Pathian ram din turin theihtawp i chhuah ang u,” a ti.

He hunah hian ZPM Leader, Lalduhoma pawhin ‘Sem Policy’ in kan ram a tihchhiat tawhzia sawiin, “Party thenkhatten ‘Sem Policy’ an tlinpui thin tih hi ZPM hruaitute leh member-te hian kan hai hauh lova. Ti ve mai tura nawrna pawh kan tawk fo thin. Pathian zarah chu thlêmna chu tun thleng hian kan la do zo a, kan do zel dawn a ni. Dikna, huaisenna, tumruhna, taihmakna leh thawhrimna chauh hi kan dinchhuahna tur chu a ni. Chutiang mite chu Hand Holding Policy hmangin, an bânah kaiin, mahni ke-a ding thei turin kan siam ang. Kan Policy - ‘Kalphung Thar, Mipui Sawrkar’ hi kan tlûkpui ngam a, kan dinpui ngam bawk a ni,” a ti bawk.

Comments

Chhiar Hlawhte