Chanchin thar thenkhat :

Mizoram-ah hri kai 6 hmu leh

Niminpiah-a Mizoram-a Sample enfiah atangin COVID-19 hri kai mi 6 hmuh belh leh an ni a, ZMC Laboratory-a Sample 520 enfiah atangin hri kai mi pathum hmuh niin, an zinga pakhat hi tualchhung-a hri inkaichhawng niin midang pahnih hi Assam Rifles mi leh sa, tunhnaia State pawn atanga rawn haw an ni a. District hrang hranga TrueNat Laboratory-a Sample enfiah 123 atangin hri kai mi pathum bawk hmuh niin Kolasib District-ah mi pahnih leh Lunglei District-ah mi pakhat, tunhnaia State pawn atanga rawn lut vek an ni. Rapid Antigen Test hmanga Sample 378 enfiah atangin hri kai hmuhchhuah an awmlo thung. Nimin khan Mizoram-a hri kai mi 6 te enkawl dam ni lehin nimin tlai dar 5:00 thleng khan Mizoram-a hri kai hmuhchhuah 4299 te atangin mi 4300 te enkawl dam an ni tawh a, hri kai enkawllai mi 90 awmin nunna chan mi 9 an awm tawh bawk a ni.

Rengdil lal te phumna sawn

Hachhek tlangdunga khaw hlun ber, Rengdil khua (Mamit District) chuan nakum January ni 12-a kum 100 an tlin tur lawmna tur denchhenin nimin khan an khaw lal lo ni tawh te ruhro chu phawrhin hmun khatah an phum a. Rengdil khaw lal ni tawh - Darsata Khiangte; Tuahkima leh Thankunga te ruhro hi Rengdil khaw kum 99 tlin champha, nimin khan Rengdil khawtlang chuan hnatlangin an phawrh a, an lal hnuhnung ber, July ni 16, 2018-a chatuan ram pan ta Lalzamanga an phumna, an khaw kum za tlin chhinchhiahna an siamna hmunah an phum a ni. Rengdil khua hi Darsata Khiangte, Durtlang leh chhungkaw dang 11-in January 12, 1922-a Bawrhsap phalnaa an din niin helaia Dil lo awm sa, Rengdil hming chawiin Rengdil khua chu an din ta a ni.

April thla ah Exam dawn

School Education Minister, Lalchhandama Ralte chuan kumin-a HSLC leh HSSLC Board Exam chu April, 2021-ah neih tum a nih thu sawiin, June thla-ah result tihchhuah tum a nih thu a sawi.

Congress Candidate tur puang

Aizawl Municipal Corporation (AMC) in-thlanna neih tur atan Congress Party chuan nimin khan an Candidate turte an puangchhuak ta a, AMC-ah hian seat 19 awmin heng te hi party mal in Congress party hian an chuh vek dawn a ni. AMC inthlanna neih hun tur hi chiang taka puan la ni lo mah se an term a tawp tawh avangin February thla khian inthlang tura ngaih an ni.

ZoRO Office hawnna nei

Zo Re-Unification Organisation (ZoRO) chuan Aizawl-a an Office chu kumin atan nimin khan an hawng a, he hunah hian ZoRO President, R. Sangkawia chuan ZoRO chu khawvel hmun hrang hrang a awm Zofa chipeng hrang hrang te insuihkhawm a, rorelna pakhat hnuaia an awm theih nana beitu an ni tih sawiin, theihtawp chhuaha hmalak zel an tum thu a sawi bawk.