State Task Force for COVID-19 Vaccination in COVID-19 hri danna pek dan tur an thlirho

COVID-19 hri danna (vaccine) pek dan tur ngaihtuahtu, State Task Force for COVID-19 Vaccination chu nimin khan a tum hnihna atan thukhawmin hmalakna kal mek leh hmalak zel dan tur an thlirho a. Mizoram-ah hian Serum Institute of India (SII) siam ‘Covishield’ chu pek a ni dawn a ni.

SAD Conference Hall-a he thutkhawm neih hi Health Secretary, H. Lalengmawia chuan kaihruaiin India ram State thenkhat zingah Health Care Workers vaccine beneficiary la tifel hleithei lo an la awm laia kum kalta lama Mizoram in a peihfel thei chu Health Department-a thawktute remhriatna leh thawhrim rah a ni tih sawiin, a tifel hmasa zinga an tel thei chu chhuanawm a tih thu a sawi a. Vaccine pe chhuak tura Mizoram inpuahchahna te chu lungawithlak a tih thu a sawi bawk.

He thutkhawm ah hian January ni 16, 2021-a India Prime Minister, Narendra Modi-a'n a tlangzarh veleh a COVID-19 hri danna (vaccine) Mizoram-a kalpui dan tur sawrkar laipui in a ruahman chu tha taka kalpui turin engkim inpuahchah fel tawh a nih thu tarlan a ni a, Vaccine tlangzarh ni hian India ram puma vaccine pekchhuahna hmun (vaccination site) 5000 ah hri danna hi pekchhuah tur a ni.

Mizoram-ah chuan hemi ni a hri pekchhuahna tur hmun pali - Aizawl Civil Hospital, Lunglei Civil Hospital, Kulikawn Sub-District Hospital leh Upper PHC, ITI-ah te kalpui nghal a ni anga. Sawrkar laipui ruahman danah chuan vaccination site atan hian Healthcare Facilities hman tur a ni a, School leh hmun dang hman phal a ni lo. State tinah hian Vaccination Special Site neih tur a ni a, State lian-ah pahnih neih turin State tenau ah pakhat neih tur a ni. Heng Special Vaccination Site-ah hian Video Conferencing system dah tur a ni a, Sawrkar Laipui nen inthlunzawmin a tul hun apianga inbiakpawh theih tur a ni ang.

Sawrkar Laipui ruahman angin Mizo-ram-ah chuan Health Care Workers hovin an dawng hmasa dawn a, a dawng turin mi 14,421 (State Health Care Workers 14,107 leh Central Health Care Workers 314) chhinchhiah tawh an ni a. An zingah hian Doctor leh Nurse bakah Damdawi In-a thawktu hrang hrang te leh Ambulance driver te an tel a. Sawrkar laipuiin Operational Guidelines a duan sa khauh taka kenkawh tur a ni.

Vaccination Site-ah te hian Room pathum - Waiting Room, Vaccination Room leh Observation Room a awm tur a ni a. Thutna felfai leh Tui thianghlim in tur a awm tel tur a ni. Vaccine tlangzarh ni hian Vaccination Site tinah mi 100 hri danna hi pek tur an ni a, January, 2021 chhungin ni 9 chhungin nitin mi 880 zel Mizoram-ah hri danna hi pek tur a ni ang.

Mizoram-a vaccine pekchhuah tur hi Serum Institute of India siam ‘Covishield’ a ni a, a thawhkhatna atan vaccine 18,500 dawn niin heng zinga 10% (1850) hi thla veng-a dahthat tur a ni. Vaccine hi Dose hnih (2) a pek tur niin vaccine Dose khatna dawn atanga ni 28 hnuah Dose hnihna hi pek leh tur an ni a. Vaccine rawn thleng hmasa hi dose hnih tur a nih avangin a thawhkhatna ah hian Health Care Workers 8,325 in an dawng thei dawn a, Sawrkar laipuiin database kaltlanga an bithliah hovin a tahtawlin an dawng dawn a ni.

He Meeting-ah hian Covishield chu uluk taka enchhinna kalpui a nih avangin a him tawk tih tarlan a ni a, vaccine pek a nih hian mi thenkhatah chuan Khawsik te an awm fo thin tih tarlan niin, hetiang an awm a nih pawhin hlauhthawnawm a nih loh thu sawi a ni.

Serum Institute of India (SII) siam Covishield hi Dose khat Rs. 200/- man vel ni tura ruahman a ni.