Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Nikum-ah Mizoram-ah ruihhlo vanga thi 67 awmin Heroin leh a kaihhnawih vanga thi an tam

Nikum (2020) chhung khan Mizoram-ah ruihhlo hmansual vanga thi mi 67 an awm a, tunhnaiah damdawi hmansual vanga thi hi an pung chho leh hret hret niin a lang.

Mizoram Excise & Narcotics Department chhinchhiah danin nikum chhunga Mizoram-a ruihhlo vanga thi hi mipa 61 leh hmeichhia 6 an ni a, an zinga mi 7 hi Heroin vanga thi an ni a, midang 60 pawh hi Heroin leh thildang tihpawlh te an ni. Kumin January ni 14 thleng khan Mizoram-ah damdawi hmansual vang hian mipa 2 an thi tawh bawk a ni.

Excise & Narcotics Department-a thawktute chuan tunhnaia Drugs vanga thi chu a ti thar ni lovin lo ti tawh thin, an dose an hriat loh vanga thi ta an ni tlangpui nia an hriat thu an sawi a, “Lockdown vang khan damdawi hmuh tur a tlem a, drugs ti thin tam takin tih tur an nei lova. Tunhnaia lockdown thlahdul anih hnuah tlema damdawi hi pung lehin tunhma a ti thin tam tak ten ni danga an dose ang kha tih leh an tum a, hei hi an OD phah ta niin a lang,” an ti bawk. Lockdown lai-a Heroin man sang tak kha tunah chuan a tlahniam leh tawh hle nia thudawn a ni bawk.

Excise & Narcotics Department chhinchhiah danin kum 1998 atanga kum 2004 inkar chhung kha Mizoram-ah ruihhlo a hluar vanglai leh thihpui an tam hunlai a ni a. Ruihhlo hmansual vang hian kum 1998-ah mi 84, kum 1999-ah mi 89, kum 2000-ah 139, kum 2001-ah mi 101, kum 2002-ah 93 leh kum 2004-ah 143 te an thi a. Kum 2004 hi damdawi hmansual vanga thi chhinchhiah anih atanga thi an tam ber kum a ni. Kum 2005 atangin drugs vanga thihna hi a tlahniam chho leh a, nikum 2020 hi drugs vanga thi an tam ber kum a ni leh ta a ni. Excise & Narcotics Department chhinchhiah danin kum 1984 atanga kumin January ni 14 thleng khan Mizoram-ah damdawi hmansual vanga thi hi mi 1648 an awm tawh a, an zinga 1455 chu mipa niin hmeichhia 193 an awm bawk.

Mizoram Excise & Narcotics Department hian nikum chhung khan ruihhlo phurh nana hman Two Wheeler 32, Three Wheeler 8, LMV 62, MMV 3 leh HMV 5 an man a. Heroin Kg. 11.724, Ganja Kg. 127 leh Mathamphetamine Kg. 45.5 an man bawk. Nikum chhung vek khan ND&PS Act hnuaiah mihring 574, MLP Act hnuaiah mi 1448, ME Act hnuaiah mi 83 leh Drugs and Liquor Law hnuaiah ramdang mi 16 an man bawk.

Comments

Chhiar Hlawhte