Nikum-ah Meth man tam

Kum kalta (2020) chhung khan Mizoram Excise and Narcotics (MEN) Department chuan Mizoram-ah Methamphetamine kg 45.547 zet manin hei hi kum khat chhunga an man tam ber kum a ni.

Mizoram Excise and Narcotics Department chhinchhiahna atanga a lan danin Mi-zoram-ah kum 2001-ah Meth hi man tan niin mum 670 man a ni a, kum 2002-ah mum 971 man leh niin hemi hnu hian man a awm zui ta lo reng a, kum 2011-ah man leh niin mum 287 man a ni a, kum 2013-ah mum 613 manin kum 2014 ah chuan mum 63,000 zet man a ni zui a, kum 2015-ah mum 54,400 manin 2016-ah mum 1500 leh 2017-ah mum 13,400 man a ni a, kum 2018-ah man awm lovin kum 2019-ah Kg. 15.839 zet man a ni leh a, kum kalta 2020 khan Kg. 45.547 man niin hei hi Mizoram-a kum khat chhunga Meth an man tam ber kum a ni ta a ni.

Hetihlai hian nikum aiin kum hmasa lama ruihhlo an man erawh a tam deuh vek thung a, Heroin, Ganja, Nitrazepam, Alprazolam, Tramadol, khuh damdawi (cough syrup) te chu nikum aiin kum hmasa chhung khan man a tam zawk a, hei bakah hian Zu leh a kaihhnawih pawh kum hmasa (2019)-ah man tam zawkin tualchhung siam Zu hi kum 2019-ah khan litre 95,665 an man laiin nikum 2020-ah litre 43,232 an man a. Zu bilh lai pawh kum 2019-ah Tin 137.733 an man laiin nikum-ah Tin 75.003 an man a. Sap Zu (IMFL) pawh kum 2019-ah um puitling 14,208 an man laiin nikum-ah um 6,621 an man a, a chanve um pawh 2019-ah um 14,769 manin nikum-ah um 323 an man bawk a ni.

Hetihlai hian Khehpum tia hriat, Pseudoephedrine chu nikum chhung khan Mizoram ah man a awmlo nia thudawn a ni thung a, Meth siamna atana hman nia sawi, Pseudoephedrine hi kum 2011 vel atang khan Mizoram-ah a lar hle a, kum 2011 atanga 2019 thleng khan kumtin man niin kum 2019-ah Kg. 90.69 zet man ni mah se nikum-ah man a awmlo thung a ni.