COVID-19 vaccine chungchangah Prime Minister in ramchhunga State tin Chief Minister te a kawm

Prime Minister Narendra Modi chuan India rama COVID-19 hri venna chungchanga hmalakna kal zelah nimin khan ramchhunga State leh UT tin Chief Minister leh Lt. Governor te Video Conference kaltlangin a kawm a, he hunah hian Mizoram atangin Chief Minister, Zoramthanga pawh a tel a ni.

Nimin a Prime Minister in ramchhunga State leh UT tin Chief Minister leh Lt. Governor te a kawmna hi Mizoram atang hian Chief Minister hian Chief Minister Office atanga lo zawmin Prime Minister chuan India ramah COVID-19 vei zat chu tlahniam zelin, vaccine lak theih thuai tura ruahmanna siam mek karah mipuiin fimkhurna thlah lova, he natna hri laka him thei tura zawm tur pawimawh hrang hrang, ‘COVID Appropriate Behaviour’ chu zawm chhunzawm zel a pawimawh thu a sawi a ni.

He hunah hian Ministry of Health and Family Welfare-a Secretary chuan sawrkar hmalakna te tarlangin, State leh UT tin chu January ni 16, 2021 hma in vaccine la tura ruahmanna siam ngai zawng zawng te an peihfel tawh tur a beisei an ni a. COVID-19 vaccine hi dose hnih (2) a lak tur a ni a, dose pahnih inkarah hian ni 28 tlain, Dose vawi hnihna lak hnu ni 14-na atangin vaccine hian a hna thawh tur dan dik takin a thawk tan a ni. Ruahman lawk ang chuan hri danna hi ramchhunga Health Care Worker (vbc. 1 bawr vela chhut) te hnenah pek hmasak an ni dawn a, Front Line Worker (mi vbc. 2 vel) leh ngaihpawimawh bik - kum 50 aia upa leh kum 50 hnuai lam, natna benvawn nei (mi vbc. 27 vel) ten an dawt leh anga. Health Care Worker leh Front Line Worker te vaccine lak man hi sawrkar laipuiin a tumsak tura ruahman a ni.

Mizoram-ah chuan COVID-19 vaccine pek tur atan hian State Steering Committee, State Task Force, District Task Force leh Block Task Force on Covid Vaccine din niin hma an la mek a. Sawrkar laipuiin a beisei angin Database-ah Healthcare Worker 14,000 chuang register tawh a ni a. Frontline Worker te data khawn mek a ni bawk.

Nimin-a he inkawmhona ah hian Vaccine dawngtute chu COVID-19 Vaccine Intelligence  Network, Co-WIN Application leh SMS hmanga Vaccine dose hnihna an dawn leh hun tur chiang taka hriattir an nih tur thu leh Session khat ah mi 100 bawr SOP uluk taka keng-kawh chunga pek tura ruahmanna siam a nih thu te tarlan a ni bawk.

He hmalakna hnuaiah hian kumin January ni 2 leh ni 8 khan Covid Vaccination Dry Run chu District tinah neih a ni tawh a. January ni 16 2021-a rampuma Covid Vaccine tlangzarhna tur atan Vaccination site hmun pali (Aizawl Civil Hospital; Kulikawn Sub-District Hospital, Aizawl; Urban PHC, ITI, Aizawl leh Civil Hosital Lunglei) thlan a ni. Covid vaccination chungchang ah hian State, District leh Block Level-ah training pek a ni bawk.

Nimin-a he hun hmanna ah hian Chief Minister hi Health Secretary, H. Lalengmawia leh NHM Mission Director, Dr. Eric Zomawia ten an tawiawm a ni.