Mizoram Forensic Science Lab. ah thubuai 842 endik

Mizoram Forensic Science Laboratory (FSL) chuan nikum 2020 chhung khan thubuai 842 khawihin, thubuai an khawih atang hian finfiahna 6,026 an zirchiang bawk.

Zawhna chhangin, FSL Director, H. Sangchungnunga chuan, Police leh Excise Department-ten thubuai endik tur an pek atangin thubuai 842 an endik thu a sawi a, heng thubuaite hi chingfelin a petute hnenah an pelet leh tih a sawi. FSL Director chuan, pawikhawihna a thlenin Police ten a hmuna endik turin FSL-a thawkte chu an ko thin tih sawiin, nikum khan pawikhawihna hmun 53-ah kala an endik thu a sawi a, Court-a thubuai an dinpui chu 160 a ni.

Mizoram Forensic Science Laboratory hi July 1, 2000 khan din a ni a. National Human Rights Commission (NHRC) inkaihhruaina dan-in a phal angin March, 2015 khan Directorate puitlingah hlankai a ni. Tunah hian Division 7-ah tihlen tawh niin, Chemistry Division, Question Documents Division, Fingerprint Division, Ballistics and Toolmarks Division, DNA Division, Photography Division leh Toxicology Division-ah then a ni.

Mizoram Forensic Science Laboratory (FSL)-a thawktute hi pawikhawihna hmun hrang hrangah kal kualin, finfiahna awm thei angte an lakhawm thin a, pawikhawihtute manchhuahna kawngah Police kutke tangkai ber pakhat a ni mek a. FSL hian Police-ten misual an man tawh kutze thla (fingerprint) chu an khawl-ah an lo vawng tha thin tih FSL Director chuan sawiin, FSL a din tirh atanga tun thlenga kutze thla an neih tawh chu 5,982 a nih thu a sawi bawk.