Mizoram-ah hri kai hmuhchhuah tlahniam mek

Mizoram-a ni 2 chhungin COVID-19 hri kai mi 2 hmuh an ni a, tunhnaiah Mizoram-a hri kai hmuhchhuah zat hi a tlahniam mek a ni.

Zirtawpni khan ZMC Laboratory-ah Sample 279 enfiah niin District hrang hranga TrueNat Laboratory-ah Sample 127 enfiah a nih bakah Rapid Antigen Test hmangin Sample 723 enfiah a ni bawk a, heng atang hian COVID-19 hri kai hmuhchhuah an awm lo a ni.

Inrinni khan Mizoram-ah COVID-19 hri kai mi pahnih hmuh an ni thung a, heng hri kai hmuhchhuah te hi ZMC Laboratory-a Sample enfiah 268 zing ami niin Aizawl khawpui chhung ami te ve ve an ni a, mi pakhat hi tunhnaia State pawn atanga rawn lut niin midang pakhat hi a chhungte zinga hri kai hmuhchhuah tawh avanga In lama inkhunghrang a ni thung. Inrinni khan District hrang hranga TrueNat Laboratory-ah Sample 161 enfiah niin hri kai hmuhchhuah an awm lova, Rapid Antigen Test hmanga Sample 683 enfiah ah hri kai hmuhchhuah an awmlo bawk.

Inrinni khan Mizoram-a COVID-19 hri kai enkawl mi 2 te chu hri lakah fihlimin anmahni enkawlna hmun atanga chhuahtir an ni a, nimin khan mi 5 te chu enkawl dam leh an ni bawk a. Heti hian nimin tlai dar 5:00 thleng khan Mizoram-a hri kai hmuhchhuah chu 4351 niin mi 4289 te chu enkawl dam an ni tawh a, hri kai hmuhchhuah atanga zaa 98.57 te chu enkawl dam ni tawhin tunah hian hri kai enkawllai mi 53 an la awm mek a, hri kai zingah nunna chan mi 9 an awm tawh a ni.

Mizoram-a hri kai enkawllai mi 53 zinga mi 45 te hi Aizawl District-a enkawl an ni a, Lawngtlai District-ah mi pathum enkawl mek niin Kolasib District-ah mi 2 enkawl an la awm bawk a. Lunglei, Siaha leh Serchhip District-ah hri kai enkawllai pakhat theuh awmin Champhai, Mamit, Khawzawl, Hnahthial leh Saitual District-ah te chuan hri kai enkawllai an awm tawhlo a ni.