Mizoram-ah COVID-19 hri kai mi 12 hmuh belh

Niminpiah-a Mizoram-a Sample enfiah 2140 atangin COVID-19 hri kai mi 12 hmuhchhuah belh leh an ni a, heti hian nimin thleng khan Mizoram-ah COVID-19 hri kai 4346 hmuhchhuah an ni tawh.

Niminpiah khan ZMC Laboratory-ah Sample 589 enfiah niin heng atang hian COVID-19 hri kai mi 7 hmuh an ni a, heng mite hi Aizawl District atanga Sample lak vek niin tunhnaia State pawn atanga rawn lut vek an ni. 

Niminpiah vek khan District hrang hranga TrueNat Laboratory-ah Sample 188 enfiah niin hri kai mi pahnih hmuh an ni bawk a, Serchhip District-ah State pawn atanga rawn lut hri kai pakhat hmuh niin Kolasib District-a tunhnaia Nisapui khaw mi hri kai hmuhchhuah nena inkawmhnaih atanga hri kai pakhat hmuh a ni bawk. Rapid Antigen Test hmangin niminpiah khan Sample 1363 enfiah niin hri kai pathum hmuh an ni bawk a, Aizawl, Champhai leh Lawngtlai District mi te niin tualchhung-a hri kaichhawng nia hriat niin hri an kaina chhui zui mek a ni bawk.

Nimin khan Mizoram-a COVID-19 hri kai enkawl mi 6 te chu hri lakah fihlimin anmahni enkawlna hmun atanga chhuahtir leh an ni a, heti hian nimin thleng khan Mizoram-ah COVID-19 hri kai hmuh tawh chu 4346 niin heng atang hian 4274 te chu enkawl dam an ni tawh a, hri kai hmuhchhuah atanga za zela 98.34 te chu enkawl dam ni tawhin tunah hian hri kai enkawllai mi 63 an la awm mek a, hri kai hmuhchhuah tawh zingah nunna chan mi 9 an awm tawh bawk a ni.