Mizoram-ah COVID-19 hri kai 4259 tling tawh

Mizoram-a COVID-19 hri kai hmuhchhuah chu 4259 an tling tawh a, hri kai zinga za zela 98.26 te chu enkawl dam an ni tawh thung.

Tunhnaiah Mizoram-ah COVID-19 hri kai hmuhchhuah awm belh zel mah se mithiam te chhut lawk ang erawh chuan hri kai punna hi a sang lutuk lo thung a, nimin-piah a Sample enfiah te atangin hri kai mi pathum hmuhchhuah belh leh an ni a. ZMC Laboratory-a Sample enfiah 278 te atangin hri kai pakhat hmuhchhuah niin Aizawl District mi, tunhnaia State pawn atanga rawn haw a ni a, Rapid Antigen Test hmanga Sample enfiah 680 te atangin hri kai mi pahnih hmuh ni bawkin Aizawl khawpui chhung ami, tualchhung-a hri inkaichhawng nia an ni a, District hrang hrang TrueNat Laboratory-a Sample enfiah 134 te atangin hri kai hmuh thar an awmlo thung a ni.

Heti hian nimin thleng khan Mizoram-ah Sample enfiah tawh chu 1,85,161 niin heng atang hian COVID-19 hri kai hmuhchhuah 4259 an tling ta a, Sample enfiah zawng zawng atanga za zela 2.30 te chuan hri kaiin nimin khan hri kai 13te chu enkawl dam leh an ni thung a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh 4259 te atangin 4185 te chu enkawl dam an ni tawh a, tunah hian hri kai enkawllai 66 an la awm mek a ni. Nikum-a Bihar inthlanna Thenzawl atanga Duty-a kal, Serchhip District an rawn thlen hnua COVID-19 hri kai hmuh leh a hnua boral chu sawrkar in COVID-19 vanga boral-a a pawm tak hnuah Mizoram-a hri kai zinga nunna chan chu mi 8 an ni tawh bawk a ni.

Hetihlai hian India ramah chuan nimin thleng khan COVID-19 hri kai hmuhchhuah chu 104,13,417 an tling tawh a, darkar 24 kalta chhung khan hri kai hmuhchhuah thar 18,139 awmin hri kai zingah hian mi 100,37,398 te chu enkawl dam ni tawhin hri kai zinga zaa 96.39 te chu enkawl dam an ni tawh a, tunah hian hri kai enkawllai 2,25,449 leh nunna chan 1,50,570 an awm bawk a ni.