Latest News

Saitual-ah District Commissioner's Office Complex dinna tur lungphum Chief Minister in a phum

Saitual District-a Office hmunpui tur, ‘District Commissioner's Office Complex’ lungphum chu nimin khan Chief Minister, Zoramthanga chuan a phum a, Saitual-ah hian District Horticulture Officer (DHO) Office thar a hawng nghal bawk.

Nimin a lungphum phumna puala inkhawm Saitual DC Complex-a neih ah Chief Minister, Zoramthanga chuan Covid hrileng in hmalakna tam tak tithuanawp mahse theih ang angin sawrkarin ruahmanna a siam tawh te bawhzui char char a nih thu a sawi a. District Office Complex siam chungchangah Chief Minister chuan, hmun khata Department Office hrang hrang te an awmkhawm chuan Office dawrtu tur mipui tan a awlsam phah zawk dawn avanga chutianga ruahmanna siam chu a nih thu a sawi. Chief Minister chuan Saitual khawpui chu thang zel tur a ni tih rilru ah pai reng chungin tun atang hian khaw mipuite rilru ah khua hmasawn zel dan turah ruahmanna (plan) felfai tak nei turin a chah bawk a ni.

He hunah hian bialtu MLA, R. Lalzirliana chuan Saitual District chu District puitling a hlankai a nih a, hna thawk thei a siam a nih hnuah hmasawnna thar hmuh tur a awm zel chu lawmawm a tih thu a sawi a. Mizoram sawrkarin District thar pathum-a District Office Complex siamna tur cheng vbc. 10 theuh a ruahman chu lawmawm a tih thu a sawi a. Hri lengin ziaawm lam a pan zel beisei chungin DC Complex leh hmalakna dang awm zel tur te chu ruahman anga tha taka peihfel a nih theih nan District mipuite chu sawrkar tawiawm tha turin a sawm bawk a ni.

Nimin-a Saitual District Commissioner's Office Complex lungphum phumna hun hi Additional Chief Secretary, J.C Ramthanga chuan kaihruaiin Saitual-a DHO Office thar hawn a ni ta chu lawmawm a tih thu leh District Office Complex changtlung tak din zawh thuai a beisei thu a sawi a. Horticulture Department Director, Dr. Elizabeth Saipari pawhin DHO Office thar hawn tak chu mipui, a bik takin kuthnathawktuten tangkai taka an chhawr a beisei thu a sawi bawk.

Comments

Chhiar Hlawhte