Latest News

North Vanlaiphai tana tui lak hna thawh mek enfiah

Image
North Vanlaiphai khaw mipui tana tui thiang-hlim in tur lakna tura hnathawh kal lai mek, North Vanlaiphai Water Supply Scheme, Rawleihlawn Pumping chu tunhnai khan North Vanlaiphai Village Council leh North Vanlaiphai Joint YMA hruaitu ten a hmunah kala enfiahin, hna thawh tawh te tha an tih thu an sawi a, hna chak leh tha zawka thawk zel turin an ngen.

Kum khat chhungin vaccine pek kim beisei niin Mizoram-ah mi 3979 te hri danna pek an ni tawh

Mizoram-ah January 16, 2021-a COVID-19 Vaccine, Covishield pek tan a nih hnuah COVID-19 vaccine chu sawrkar laipui atanga hmuh that a nih chuan Mizoram-ah kum khat chhungin Vaccine hi pek zawh beisei niin Vaccine la tawh zingah damdawi In panpui ngai an awmlo thung.

State Immunisation Officer, Dr. Lalzawmi sawi danin tunah hian a thawh khatna atan COVID-19 buaipuitu, Health Care Workers te chauh hri danna hi pek an ni a, a thawh hnihnaah Home Department-in Frontline Worker a tihte hnenah pek leh an ni ang a, a hnuah natna benvawn neite hnenah pe lehin hemi zawh hian mipui nawlpuiah vaccine hi pek a ni dawn a ni. Dr. Lalzawmi chuan, “Mipui-a vaccine pek hun tur hi hriat a la ni lo a, a tahtawlin kan pe zel dawn a. Mahse, kum 18 hnuailam te, nau pai leh nau pawm bakah natna benvawn nei chu pek a ni rih dawn lo a ni,” a ti.

Mi thenkhat vaccine la tura hming pelut, mahse vaccine pek an nih loh vanga vuite chuan thil awm dan an hriat fuh tawk loh vang a ni tih sawiin, “Vaccine la tura hming pek lai hian an chanchin dang ziak lovin an hming chauh ziah a ni a. Mahse, nu nau pai leh nau pawm te, BP sang nasa, Zunthlum nasa leh damlo mekte chu vaccine hi pek a rem lo a. Heng mite hi vaccine pek an ni dawn lo tihna ni lovin sawrkar laipui duh dan angin an natna a zia hunah vaccine hi pek an ni leh dawn a ni,” a ti.

COVID-19 vaccine chu a him tawk nia sawiin Dr. Lalzawmi chuan, “Covid vaccine hi a him tawkah kan ngai a ni,” a ti a. “Vaccine reng reng hi naupangin an lak pawhin khawsik, awm nuam lo leh tap an awm thin a, puitling-ah pawh awm nuamlo te an awm bawk. Mizoram-a Covid vaccine kan pekah harsatna nei emaw, vaccine an lak vanga damdawi In panpui ngai emaw an awm kan la hre lo,” tiin vaccine siamtute an ring tawk tih a sawi.

Covid vaccine hi mi pakhat Dose hnih zel pek tur niin Dose khatna hi pek mek niin Dose khatna lak atanga ni 28-na ah Dose hnihna hi pek leh tur a ni dawn a, Inrinni zan dar 6:00 thleng khan Mizoram-ah COVID-19 vaccine dawng tawh mi 3,979 an awm a, heng te hi Aizawl East-ah 1046, Aizawl West-ah 569, Champhai District-ah 389, Kolasib District-296, Lawngtlai District-ah 430, Lunglei District-ah 485, Mamit District-ah 306, Serchhip District-ah 306 leh Siaha District-ah 152 te an ni.

Comments

Popular News (Last 30 Days)