Latest News

COVID-19 vaccine pe tura inbuatsaih mek niin Vaccine in Mizoram a rawn thleng tawh

Tunkar Inrinni, January ni 16, 2021 atanga COVID-19 vaccine pechhuak turin rampum ah inbuatsaihna tluang taka kalpui a ni a, Mizoram-ah pawh nimin khan Vaccine pek tur hi rawn phurhthlen a ni.

Sawrkar laipui ruahmanna angin India ram State leh UT hrang hrangah COVID-19 Vaccine hi semchhuah mek niin Mizoram-a hman tur Vaccine, Covishield Vaccine chu nimin khan Lengpui Airport rawn thlenpui a ni a, Covishield Vaccine hi nimin khan Kolkata atangin rawn phurhthlen niin a vaiin Dose 18,500 a ni a, State Programme Manager, Dr. Vanlalrengpuia leh Er. R. Vanlaldingngheta, State Cold Chain and Logistics Manager ten an lo dawngsawng a ni.

Mizoram in COVID-19 Vaccine a dawn te hi Serum Institute of India (SII), Pune atanga lak a ni a, Lengpui Airport atang hian venhimna khauh tak hnuaiah Aizawl rawn panpui niin Dr. Lalzawmi, State Immunization Officer leh Official dang ten Health Department Principal Director Office kawt-ah an lo dawngsawng a. Thuthar thehdarhtute zawhna chhangin Dr. Lalzawmi chuan rampumah January 16 khian Prime Minister, Narendra Modi-a’n hawnna a neih zawh ah hri danna hi pek a nih dawn thu a sawi a. Mizoram chan tur Covishield Vaccine hi Aizawl Civil Hospital State Vaccine Store-ah dahthat nghal niin tunkar Inrinni khian Civil Hospital Aizawl, ITI Urban Primary Health Centre, Zoram Medical College (ZMC) leh Lunglei Civil Hospital-ah Dose 100 zel pekchhuah a ni ang.

COVID-19 vaccine pekchhuah dan turah hian State/UT te nen Vitual Meeting/Training tum 26 neih a ni tawh a. Peng hrang hranga thawktute chu mawhphurhna hrang hrang hlenchhuah kawngah mamawh an ni dawn a. Hemi kaihhnawihah hian Master Trainee 2360, Programme Manager 61,000, Vaccine petu mi nuai 2 leh Vaccination Team member dang nuai 3.7 te chu training pek anni tawh a ni. Union Health Secretary, Rakesh Bhusan chuan a tahtawl a Vaccine pekchhuah turah hian kum bithliah bik kum 50 chunglam leh kum 50 hnuailam zinga natna benvawn nei mi vbc. 27 velte chu thawhhnih a sawrkar leh Private Sector-a damdawi lama thawktu mi vaibelchhe khat velte leh hma tawng a thawktu mi vaibelchhe 2 velte vaccine pek an nih hnuah pek an ni dawn tih a sawi a. Nimin tlai dar 4:00 thleng khan vaccine dose 54,72,000 dawn anih tawh thu pawh sawiin, Serum Institute of India (SII) atangin Dose vbc. 1.1 leh Bharat Biotech India Limites (BBIL) atangin Dose nuai 55 chu State leh UT ten an dawng vek dawn tih a sawi bawk.

Comments

Chhiar Hlawhte