COVID-19 hri kai 1 hmuh leh

Niminpiah (Pathianni) khan Mizoram-ah COVID-19 hri kai mi pakhat hmuhchhuah belh leh a ni.

Mizoram-a hri kai hmuhchhuah hi Lunglei District-a hri kai hmuhchhuah niin BSF Sipai, tun-hnaia State pawn atanga rawn lut a ni. Niminpiah khan ZMC Laboratory chu thenfai a nih avangin Sample enfiah a awm lova, District hrang hranga TrueNat Laboratory-ah Sample 66 enfiah niin Rapid Antigen Test hmangin Sample 144 enfiah a ni bawk a ni. Nimin khan Mizoram-ah CO-VID-19 hri kai mi 2 enkawl dam leh niin heti hian nimin tlai dar 5:00 thleng khan Mizoram a hri kai hmuhchhuah chu 4293 an tling ta a, an zinga 4194 te chu enkawl dam ni tawhin hri kai za zela 97.69 te enkawl dam an ni tawh a, tunah hian hri kai enkawllai 90 awmin hri kai zingah nunna chan mi 9 an awm tawh a ni.

India ramah hri kai enkawl dam an pung zel :

India rama COVID-19 hri kai hmuhchhuah chu 1,04,66,595 an tling tawh a, hri kai zinga 1,00,92,909 te chu enkawl dam an ni tawh thung. Chhinchhiahna atanga a lan danin darkar 24 kalta chhung khan India ramah COVID-19 hri kai 16,311 hmuh belh leh niin heng te nen hian India rama hri kai hmuhchhuah chu 1,04,66,595 an tling tawh a, darkar 24 kalta chhung vek khan hri kai 19,299 te chu enkawl dam leh niin tun thlenga hri kai enkawl dam chu 1,00,92,909 an tling tawh a, hri kai hmuhchhuah atanga za zela 976.43 te chu enkawl dam an ni tawh a ni. India ramah hian darkar 24 kalta chhung khan hri kai zingah nunna chan mi 161 awm lehin tun thlengin hri kai zingah nunna chan 1,51,160 an awm tawh a, tunah hian hri kai enkawllai 2,22,526 la awmin hei hi hri kai hmuhchhuah atangin zaa 2.13 chauh a ni tawh a ni.

India ram State hrang hrang zingah Kerala chu hri kai enkawllai tam berna niin mi 64,179 enkawl mek an ni a, Maharashtra State chuan dawtin mi 54,179 enkawl mek an la ni bawk.