Chanchin thar thenkhat :

MURA te sawrkar in chhawmdawl zel tum

Land Revenue & Settlement Minister, Lalruatkima chuan Mizoram Underground Returnees Association (MURA) te chu ram tana an inpekna te Sawrkarin hre rengin a theih ang ang a chhawmdawl zel a tum tih a sawi. Nimin zing-a Aizawl Tuivamit-a Mizoram Underground Returnees Association (MURA) te chhawmdawlna atana In hmun pek a enfiahna ah Revenue Minister chuan he thu hi a sawi a. Sawrkarin chhawmdawlna a pek chu zah saka anihna ang taka hmang a, midang hnena hralh lo tura ruahmanna siam a ni chu tha a tih thu a sawi bawk. 

Helai hmunah hian In hmun 45 ruahman a ni a, Power & Electricity Department-in helai hmunah hian ram an neih ve bawk avangin enfiah that a tul tiin Minister ho hian endik a ni.

SSU Pisa hawnna neih a ni

Zirlai mahni-a inchawm te inthlunkhawmna pawl, Students' Self-Suppport Union (SSU) te chuan kumin (2021) atan Aizawl-a an Pisa chu nimin khan an hawng leh tan a, SSU Pisa hawnna puala inkhawm neih ah hian an pawl Adviser, James Ramdinmawia chuan SSU chu pawl dang ang a ni lo tih sawiin, rim taka thawk tur an ni tih a sawi a. “Mizo zirlai, Pawl 10 chin chunglam zawng hi SSU nunpuitu ni sela, an zirna senso-ah intodelh vek sela, nu leh pa an chhawk zang-khai hawk dawn tihna a ni a, chhungkaw tin sum lakluh a lo pung anga, chu chuan kan ram Economy hi a chawikang dawrh ang,” a ti bawk.

Kum kalta ah lirthei thar tam

Mizoram sawrkar-a Transport Department chuan nikum chhung khan lirthei 23,520 an ziaklut. Nikum chhung khan chawhrualin thla tin lirthei 1,960 ziahluh ziah ang a ni a, heng zinga 15,479 chu Aizawl District a ziahluh a ni a, 11,134 chu lirthei kehnih nei (two wheeler) a ni. Nikum chhung vek khan lirthei khalhtute hnenah Driving License 9,719 pekchhuah a ni a, Learner License 29,423 pekchhuah a ni bawk.

Golf Course tlawhtu tam thin

Thenzawl Kanan Veng, Khawibelphul hmuna Golf Course chu tunlai hian Mizoram hmun hrang hrang atangin tlawhtu an thahnem thin hle. Thudawn danin Krismas vuakvet lai atang khan Golf Course tlawhtu hi an tam thin viau a, nikhat-a mi 150-200 chuang te awm thinin khualzin zingah Golf Resort a riak thin te leh Inneih thlalak nana hmang thin te pawh an pung sawt hle a ni.

Hetianga Khualzin hip tak anih avang hian Thenzawl Town Task Force hruaitute chuan Golf Course hi tlawhin, Golf Course enkawltute chu hri leng laka fimkhur a tul thu te an sawipui bawk a ni.

AMC inthlan la hun lo ah ngai

Peoples’ Conference (PC) Party chuan Aizawl Municipal Corporation (AMC) term thar tur inher-chhuah hun hle tawh mah se COVID-19 hripui leng nawn mai thei dinhmuna kan la din reng avangin AMC inthlanpui neih chu ala hun rihlo ah an ngai tih nimin khan thuchhuah siamin an tarlang a, AMC inthlan lo awm turah fimkhur leh uluk taka hmalakna kalpui tura Mizoram sawrkar an beisei thu leh mipuite himna tur thlir chunga hmalakna kalpui tura Political Party te an sem thu an sawi bawk. PC Party chuan AMC inthlan hun puan a nih pawha inthlang mai tura Mizoram State Election Commission in ruahmanna fel tak neia a inbuatsaih chu fakawm an tih thu an sawi bawk.

BJP in Trainers Training nei

BJP Mizoram Pradesh chuan nimin khan Aizawl-a an Office-ah Trainers Training an nei a, he hunah hian an President, Vanlalhmuaka chuan COVID-19 hripui leng avangin duh anga hma an lak theihloh thu sawiin, tun kumthar-ah hian AMC inthlanna an hmachhawn dawn avangin BJP Member te chu rilru thar nen tha tharin AMC Seat a tam thei ang ber an lak theihna tura theihtawp chhuah turin a sawm bawk. Nimin a he hun hman hi BJP Nagaland President, Temjen Imna Along pawhin rawn hmanpuiin BJP Mizoram chu kum 2023 MLA inthlan ah chuan Sawrkar ngei tur a hmala a, tha thlah lova theihtawp chhuah tur an nih thu a sawi bawk.