Latest News

Chief Minister in COVID-19 vaccine kan lak vek a pawimawh thu a sawi

Chief Minister Zoramthanga chuan COVID-19 hridanna chu mimal duhthlanna ni mahse mi zawng zawngin kan him leh kan damtlan nan kan lak vek a pawimawh tih a sawi.

Vawiin atanga COVID-19 hri danna pekchhuah tur chungchanga mipuite hnena thuchah a siamah Chief Minister, Zoramthanga chuan COVID-19 hripui chuan khawvel runin, Mizoram thleng pawhin harsatna tam tak mipuite hnenah a thlen tih a sawi a, he hrileng dona ah hian Sawrkar chuan mithiamte leh Kohhran hruaitute bakah NGO hruaitute nen inrawntlangin mipuite kan him nan Dan zawm tur leh tihtur chi hrang hrang te a siam a, chung Dan siam te chu Mizoram mipui ten tha takin kan zawm a. Pathian zahngaihna leh mipuite thuawihna avang hian tun dinhmunah chuan hrileng hian ziaawm lam a pan hret hret zel a, COVID-19 vei pawh kan State chhungah an tlem chho tial tial bawk tih a sawi a. “Heng te avang hian Mizoram chu India ram pumah COVID-19 vanga damlo leh nunna chan tlemna ber kan ni thei a, hei hi kan zavaia kan tanrualna leh intawiawm tawnna rah a ni tih ka sawi duh a ni,” a ti.

Chief Minister chuan India chuan he hri leng laka invenna (Vaccine) chi hnih a siamchhuak ta tih sawiin, uluk tak leh fimkhur taka enchhinna neih a nih hnuah hemi atana ruat, India rama mithiam bik te (Expert Group) chuan he invenna chi 2 te hi mipui tan a him tawk leh tha tawk a ni tiin, mipui vantlang hman theih turin January 3, 2021 khan an chhawpchhuak ta tih a sawi a. He hri danna pekchhuah tanna hi Vawiin hian New Delhi atanga hman a ni dawn tih sawiin, COVID-19 hri danna hi India ram mipui zawng zawngin a thlawn a dawn vek tura ruahmanna siam a ni tih a sawi a, a thlawna kan dawng thei tur chu a lawmawmin mipuite pawhin kan hlut tur a nih thu a sawi a. “Hri danna pek dan hi Election/inthlanna ang chiah a kalpui tur a ni a, midang chan ai lo dawn khalh a theih dawn lova, a dawng turte hnena pek dan turah Mizoram sawrkarin thu a nei lova, sawrkar laipui ruahmanna siam anga khauh taka zawm tur a ni ang,” a ti. Chief Minister chuan tun dinhmunah hian India sawrkar hian Vaccine hi kan duh ang zat min pe thei lo mahse la, mipui zawng zawng indaih tur hi a tahtawlin min rawn pe dawn tih a sawi bawk.

Comments

Chhiar Hlawhte