Serchhip District-a Health Care Workers mi 419 te COVID-19 Vaccine pek an ni tawh

Serchhip District-ah nimin thleng khan mi 419 te hnenah COVID-19 Vaccine pek a ni tawh a, Vawiin-ah hri danna pek thawhkhatna hi zawhfel beisei a ni.

Serchhip CMO Office atanga thu kan dawn danin Serchhip District chhunga Health Care Workers hri danna la tura thun tawh mi 855 te tan hian a thawhkhatna ah mi 450 te vaccine pek tur hi rawn thlengin tun thla ni 21 atang khan hri danna hi pek tan a ni a. A bul tanni hian Serchhip Town chhunga mi 131 te hnenah hri danna pein a tuk, January 22 khan Serchhip Town-a mi 111 leh Thenzawl-a mi 64, an vaiin mi 175 hnenah hri danna hi pek leh a ni a. January 25, 2021 khan Mercy Hospital-ah mi 30 leh Thenzawl-ah mi 42, an vaiin mi 72 te hri danna pek leh an ni a, niminpiah khan District Hospital Eye Ward-ah mi 41 te hri danna hi pek leh niin heti hian mi 450 hri danna pek tura ruahman ah mi 419 te hri danna pek an ni tawh a, Vawiin hian Ngentiang PHC leh Khawlailung PHC-ah te hri danna hi pek leh tura ruahman niin heti hian a thawh khatna a vaccine pek tur chu zawhfel theih beisei a ni.

Serchhip District Level Task Force on COVID-19 Vaccination-a Member Secretary, Dr. Lalhlunpuii chuan tun tumah hian mi 500 hnena hri danna pek tur daih an dawn thu leh amaherawh chu 10% (dose 50) chu tihchhiat palh venna atan dah hran niin heti hian mi 450 hnenah vaccine hi pek tur a nih thu a sawi a. Amaherawh chu Vaccine tihchhiat hi an neih lemloh avangin mi 500 hnenah hri danna hi an pe thei mai thei tih a sawi a ni. Dr. Lalhlunpuii chuan Vawiin hian Vaccine dang la leh turin Aizawl an kal leh dawn thu sawiin, hei hi 2nd Phase tura ruahman a nih thu leh he Vaccine rawn thleng thar hi PHC pathum-ah pek leh tur a nih thu a sawi a. Hei hi pek kim theih a nih chuan Serchhip District-a Health Care Workers te chu vaccine pek kim theih an in beisei thu a sawi bawk.

Tarlan tawh angin Serchhip District-ah hian hri leng dona kawnga thawktu zinga hri danna pek turin mi 2978 te hming chu thehluh a ni tawh a, heng mite hian hri danna an lak zawh hnah kum upa leh natna benvawn nei te chu hri danna hi pek leh tur an ni dawn a ni.