Latest News

Chanchin thar thenkhat :

Participatory Budgeting Initiative tlangzarh

Lunglei-a District Local Administration Officer (DLAO) Office leh Salem Veng Village Council te buatsaih tualchhung sawrkar-ah mipui te huam zau zawka an tel ve theihna tura hmalakna chikhat, Participatory Budgeting Initiative Salem Veng Village Council chu Inrinni khan HPC Vice Chairman, Lawmawma Tochhawng MLA chuan Lunglei Salem Veng-ah a hawng a, Participatory Budgeting Initiative-ah hian Salem Veng VC in kum 2021 chhunga development sum an hmuh hrang hrang atanga hmasawnna hnathawh turah rawtna siamin, vote hmangin project tha ber pathum thlang chhuakin chutah chuan hmalak a ni ang a, hnathawh zawhah mipuiten a that leh that loh an en thin dawn a ni.


Bungrua rawn lut mumallo

India leh Myanmar inrina-a Myanmar lam, Khawmawi-ah chawlhkar hnih chhung hri leng avanga inkharkhipna kalpui mek a nih avangin tunhnaiah Zokhawthar Border Trade-ah bungrua rawn lut a awm lova, ram pahnih te inkalpawhna Gate pawh khar a ni bawk. Zokhawthar Border Trade kaltlanga bungraw lut hi COVID-19 avangin nikum March thla atang khan a mumal tawh lova, Dan anga phalna neite tan bungraw thiarluh theih ni mah se bungrua hi tum dang angin a lut tam chuang lo niin Zokhawthar-a sumdawng te chuan an sawi.


CADC in zirlai tan ruahman

Chakma Autonomous District Council (CA-DC) hnuaia Education Department bultumin an huamchhunga zirlaite hnena man tlawm zawka lei theih tur, ni zung chakna hmanga zirna khawnvar chu tlangzarh a ni a, he ruahmanna hi CADC huam-chhunga Sikul 65 atangin zirlai 6739 ten an hmang tangkai thei dawn a ni. CADC hian he Scheme hi Zoram Energy Development Agency (ZEDA) te kaltlangin a buatsaih a, he nizung chakna hmang khawnvar hi a man pangngaiah chuan Rs. 480 a nih laiin zirlaite hian Rs. 80 in an lei thei dawn a ni. 


Rajya Sabha MP in ramri tlawh

Rajya Sabha MP, K. Vanlalvena chuan Zir-tawpni khan Tlabung leh a chheh vela 60th Battalion BSF Border Out Post (BOP) hrang hrang a tlawh a, International Boundary, Kawr-puichhuah leh Tepreghat Border Fencing, Gate No.1 to 3-te a tlawh nghal bawk. Ramri a tlawhna ah hian Rajya Sabha MP chuan BSF, Assam Rifles leh BRTF-te chu tlang mite thian a nih angin an awmna hmun apiangah tualchhung mite nen an harsatna a inpuitawn turin a chah a. Ramri chu a ngaih pawimawh thu sawiin, Chakma foreigner, dan lova lut leh chhuakte an awm em tih enfiah tur leh helai ramri vela mipui harsatna hrang hrangte enfel tura kal a nih thu a sawi bawk.


Adviser to CM in tlawh

Adviser to Chief Minister, C. Lalramzauva chuan Inrinni khan Thenzawl khua tlawhin Then-zawl Field Veng-a Bazar Building sakna hmun turte, Thenzawl Vengthar-a PHE Department Tui dahkhawlna hmun siamthat turte leh Thenzawl Venghlun-a Auditorium sak mek te a tlawh bawk. Adviser to CM hian an Party hruaitute kawmin Serchhip bial-a bye-election lo awm turah Bial chhunga khaw hrang hrang ten an khaw tana hma-sawnna tur ngaihtuah chunga Ruling Party Candidate an thlantlin a pawimawh thu a sawi bawk.


Damdawi In-a naute rubo

Civil Hospital Lunglei nau neihna Ward atangin nausen, ni 4-a upa chu Nurse anga inchhal pakhatin a ru bo nia FIR thehluh a ni a, Police ten tun thlengin man an la nei lo. Thudawn danin, Tippereghat-a khawsa Dilon Chakma leh Surota Chakma-te fapa, tun thla ni 20-a piang chu nimin zing dar 4:30 vel khan a pianna, Civil Hospital Lunglei nau neihna Ward atangin Nurse anga inchhal pakhatin naute chu up lum a ngai nia sawiin a pawm chhuak a, dahlet leh tura a sawi hunah hian dah let a ni ta lo a ni.

Comments

Chhiar Hlawhte