Chanchin thar thenkhat :

Dy. CM in lungphum phum

Deputy Chief Minister, Tawnluia chuan nimin khan Chaltlang-a Public Multipurpose Utility Centre sakna tur lungphum a phum. Public Multi-purpose Utility Centre sakna tur lungphum phum puala inkhawm ah hian Deputy Chief Minister chuan vantlang in kawng hrang hranga an chhawr tangkai tlan theih tur leh hmasawnna rotling leh Aizawl khawpui ti changtlungtu tur Public Multipurpose Centre chu veng chhung mipuite chauh ni lovin veng dang te pawhin an chhawr tangkai theih ngei a beisei thu sawiin, a building satu tur contractor te chu an hna uluk tur leh an hnathawh te pawh ngun taka lo vilpui turin Chaltlang khaw-tlang hruaitu te chu a ngen a ni. Chaltlang-a Public Utility Centre hi State Fund-a thawh tur a ni.

Ram enkawl dan tur sawiho

Nimin khan Addl. Chief Secretary, JC. Ram-thanga hovin CM Conference Hall-ah sawrkar Department hrang hrang ram neihte enkawl leh hman zui dan tur ruahmanna, ‘The Mizoram Government Land Pooling and Management Scheme’ chungchang sawiho a ni a, The Mizoram Government Land Pooling and Management Scheme hi kum 2018 September thla a sawrkar in a Notify tawh niin he Scheme hnuaiah hian Department hrang hrangten document an neih te GAD ah an thehlut a. Department thenkhatin ram zau tak tak an neih laia a thenin an nei loh avangte leh rualkhai zawk leh tangkai taka ram hman a nih theih nan leh thil pawimawh dangte ngaih-tuah a hmalak a nih theih na tura ruahmanna a ni. 

Hri kai enkawllai 63 awm

Mizoram-ah COVID-19 hri kai enkawllai mi 63 awm mekin District hrang hrang zinga hri kai enkawllai tamna ber Aizawl District-ah mi 48 enkawl mek an ni a, Kolasib District-ah mi 5, Lawnglai District-ah mi 4, Lunglei District-ah mi pathum leh Siaha, Serchhip leh Khawzawl District-ah pakhat theuh enkawl an ni a, Cham-phai, Mamit, Hnahthial leh Saitual District-ah hri kai enkawllai an awmlo a ni.

Deputy CM in tlawh

Deputy Chief Minister, Tawnluia chuan nimin zing khan Aizawl North-III MLA bial chhunga Veng thenkhat tlawhin sawrkar hmalakna thenkhat a en a, heng zingah hian Edenthar Field-a Phullem (Astro Turf) phahna tur te, Chanmari Veng kawng tihzauhna tur ‘Improvement of Chanmary Junction’ leh Hunthar Veng-a ‘Chhawnzinga Water Supply Scheme’ te a tel a. He hunah hian Deputy Chief Minister chuan MNF sawrkar hnuaiah hma-sawnna hnathawhna tur pawisa awm fel sa lovin Lungphum an phum ngai lo tih a sawi bawk.

Hnahlan-ah chenna In kang

Nimin zing dar 4:00 vel khan Hnahlan Veng-thlang-a Dawngsiankhupa te In, mi 4 chenna In chu a kang a, bungrua engmah chuh hman a ni lo. Thudawn danin kangmei chhuah lai hian In neitu hi hmundang-ah hnathawka riakin a nupui leh a fate pahnih chu In-ah hian an awm a, kang-mei a chhuak tih an hriat hian alo nasat tawh avangin tukverh atanga zuangchhuakin vanneih thlak takin hliam tuar lovin an chhuak a ni.