Chanchin thar thenkhat

Tuizem sem tur vailiam

Serlui bialtu MLA, Lalrinsanga Ralte chuan nimin khan a bial chhung khaw hrang hranga sem tur Plastic Tuizem 211 chu Vairengte atangin a vailiam. Heng Tuizem a vailiam tak te hi litre 1000 dawng niin MLA Fund atanga sem a ni a, Serlui bialtu MLA chuan a bial chhunga mi harsa zawk ten tui thianghlim leh hrisel zawk an lo dah khawl a, Thal tui harsat zualpui laia tui mamawhna phuhruk theihnan Tuizem hi sem a nih thu a sawi a, nikum (2020) khan Plastic Tuizem hi a bial chhung khaw hrang hranga chhungkaw 185 hnenah a lo sem tawh bawk a ni.

Serlui bialtu MLA hian Vairengte Dumping Ground leh Vairengte CHC-a Morgue House a hawng nghal bawk a, Dumping Ground hi cheng nuai 54 seng-a UD&PA Department siam niin Vairengte CHC-a Morgue House hi MLA Fund hmanga sak a ni thung.

MZP in an Office an hawng

Mizo Zirlai Pawl (MZP) General Hqrs. chuan nimin khan Aizawl-a an Office, MZP Pisa Pui chu kumin atan an hawng leh tan ta a, nimin a an Pisa hawnna hunah hian MZP President, B. Vanlaltana chuan MZP hian kum 1935-a din a nih atangin zirna lam hawi leh hnam inpumkhatna hi a ngai pawimawh em em tih sawiin, “He ram lo hi ramdang kan nei lo a. He ram tana fahrin man hla ni turin kan inbuatsaih a ngai,” a ti a. Hnam inpum-khatna a ni emaw, zirna kawngah a ni emaw Pathian duhdana kal chu an tihtur a nih thu a sawi bawk.

MSU Office hawng leh tan

Mizo Students' Union (MSU) General Hqrs. chuan Aizawl-a an Office, Pisa Pui, Mizo Zirlaite Rûn chu kumin atan an hawng leh tan ta a, an Office hawnna puala inkhawm hi nimin khan neiin he hunah hian an President, J. Lalmuanzuala chuan MSU chuan kum li lai ‘Ram leh Hnam humhalh nan Zirna Uar’ tih chu kumpuan thupui atan an lo hmang tawh tih sawiin, Mizo zirlaite tana rawng an bawlna kawngah chak zawka hmalak a nih tur thu a sawi bawk.

ZPM in Manifesto tlangzarh

ZPM Party chuan Aizawl Municipal Corporation (AMC) inthlanna lo awm tur atana an Manifesto chu nimin khan Aizawl-a an Office-ah an tlangzarh a, ZPM Leader, Lalduhoma chuan a tlangzarh a ni. ZPM in AMC inthlan Manfesto an tlangzarh ah hian AMC ZPM in sawrkarna an siam huna an hmalakna tur point hrang hrang 7 an tarlang a ni.

MLA in Laptop Computer hlan

Aizawl North-III bialtu MLA, C. Lalmuan-puia chuan Mizoram Youth Commission (MYC) bultuma IAS Coaching Academy, New Delhi a kal tura a bial chhung Electric Veng atanga tling- Lalthlamuana Sailo leh J. Lalchhandami te chu nimin khan Laptop Computer a hlan a, sawrkar in a tanpuina bakah harsatna an neih chuan a tlanchhiat loh tur thu a sawi bawk.