Latest News

Chanchin thar thenkhat :

Dept. 2 aiawh te thukhawm

Nimin khan Land Revenue & Settlement Department changtu Minister, Lalruatkima Pisa-ah amah leh Forest Minister, TJ. Lalnuntluanga hovin Mizoram chhunga leilet neih theihna hmun (Potential Area) humhalh leh uluk taka enkawl dan tur chungchang ngaihtuahin Agriculture Department leh Land Revenue & Settlement Department hotute an thukhawm a. He hunah hian Mizoram chhung hmun hrang hranga Agriculture lama intodelh theihna atan leh leilet kan neih ang ang leh Leilet atana siam theih tur hmunte uluk zawka enkawl dan tur leh hmalak dan tur an rel a, hemi atan hian Department inhnam-hnawih tur ten an hmalak dan turte an sawiho bawk a ni. He Meeting hian hmalakna hmasa atan Cham-phai atanga tan nise an ti a. Champhai Leilet Potential area hi demarcate (teh) that nise, hemi atan hian DC kaihruaina in Task Force din a hmalak ni se tih a ni bawk. Champhai District WRC Area tih fel a nih hnu hian District hrang hrangah pawh hetiang anga hmalakna hi kalpui tum a ni.


Kawngpui zauh dan tur enfiah

PWD Siaha Division in Siaha khawpui chhung kawngpui thuamthat hna an thawh mekah nimin khan Social Welfare Minister, Dr. K. Beichhua hovin kawng zim zual lai zauh dan tur enfiah a ni a, Dr. K. Beichhua chuan Sawrkar-ah kawngpui tihzauna tur Fund an dilchhuak thei lo a ni pawhin, an MLA Fund leh Siaha Town mipui tangrualin, an Job Card atang talin tihdan an ngaihtuah dawn tih a sawi a. Kawng zim zual lai tizau tura mimal ram lai hek deuh ngai te chu a neitu te hnena ngenna siam turin Joint VC te hrilhin, sawrkar ram erawh amah in a buaipui tur thu a sawi bawk.


Assembly thutkhawm ko

Mizoram Legislative Assembly 8-na thut-khawm vawi 7-na chu thla thar, February 23m 2021 atanga neih tan turin Mizoram Governor, PS. Sreedharan Pillai chuan a ko a, thutkhawm neih hun chhung leh hun hman dan tur kimchang chu BAC in an la ngaihtuah dawn a ni.


PC in Serchhip bial chuh tum

Peoples' Conference (PC) Party General Hqrs. chuan nimin khan Aizawl-a an Office-ah Office Bearers Meeting neiin Serchhip MLA-a Assembly By-Election neih turah candidate siam nise an ti a, Aizawl Municipal Corporation (AMC) leh Serchhip By-Election ah hian hripui boruak thlir chunga campaign beihpui thlak ni se an ti bawk. Hei bakah hian Thlai thar zuartuten mipui hnenah an thlai zawrh te rate mumal tak neia an hralh theih nana sawrkar in hmalakna a nei a insawi thin chu a hlawhtlin a hun tawh nia sawiin, a rang thei ang bera ruahmanna siam tawh tura sawrkar an phut thu an sawi bawk.


Chief Minister in tlawh

Chief Minister Zoramthanga chuan nimin zing khan Aizawl Republic Veng, College Veng, Bethlehem leh Bethlehem Vengthlang tlawhin khawtlang hmasawnna ruhrel siamna tur rawtna awm te a hmunah a enpui a, Chief Minister chuan Veng neituten an Veng tana tha ber leh mamawh ber turte ngaihtuahin, sawrkar hotute nen inbe-rawn chungin, hmathlir tha tak neia hma la turin a chah a. Helai bial atanga Aizawl khawpui chhung kawngpui pawhna kalkawng siam chu a ngaihpawimawh thu sawiin, Zokhawsanga Assam Rifles an insuan theih veleh hma lak tan a theih tur thu a sawi bawk.

Comments

Chhiar Hlawhte